ނަޝީދާއި ސޯލިހު ބައްދަލުކުރައްވައިފި | ރިޔާސީ ކެންޑިޑޭޓުގެ ވާހަކަ ދައްކަން "މާ އަވަސް"

ކުރީގެ ރައީސް މުހައްމަދު ނަޝީދު އާއި ކުރީގެ ރައީސް އިބްރާހިމް މުހައްމަދު ސޯލިހު މިއަދު ބައްދަލުކުރައްވައިފި އެވެ. 

މިއީ 2023 ވަނަ އަހަރުގެ ރިޔާސީ އިންތިހާބުގެ ކުރިން ދެ ބޭފުޅުންގެ މެދުގައި އުފެދުނު ހިޔާލުތަފާތުވުންތަކަށްފަހު، ނަޝީދު، އޭރު ވެރިކަމުގައި އޮތް އެމްޑީޕީން ވަކިވެވަޑައިގެންނެވުމަށްފަހު، ދެ ބޭފުޅުން ބައްދަލުކުރެއްވި ފުރަތަމަ ފަހަރެވެ. 

މި އަހަރުގެ ތެރޭގައި، ނަޝީދު އަލުން އެމްޑީޕީއާ ގުޅިވަޑައިގެންފައިވާއިރު، ކުރިއަށް އޮތް ލޯކަލް ކައުންސިލް އިންތިހާބުގައި އެމްޑީޕީގެ ހަރަކާތްތައް ވެސް ވަނީ އަލުން ފެށިފަ އެވެ. 

އެމްޑީޕީގެ އޮފީހުގައި ދެ ބޭފުޅުން ބައްދަލުކުރެއްވުމަށްފަހު، ނޫސްވެރިންނާ ވާހަކަ ދައްކަވަމުން، ނަޝީދު ވިދާޅުވީ ސޯލިހު އަކީ އެއްވެސް އިރެއްގައި "ދުރު ބޭފުޅެއް ނޫން" ކަމަށެވެ.

"އަޅުގަނޑުމެން ކުޑަކޮށް ދެބަސްވެފަ ތިއްބެއް ކަމަކު އަޅުގަނޑުގެ ހިތެއް ނުބުނޭ މާގިނަދުވަސްތަކެއް ކުރެވޭނެ އެކޭ. މާ ބޮޑު ދެބަސްވުންތަކެއްގެ ތެރެއަކު،" ނަޝީދު ވިދާޅުވި އެވެ.

ސޯލިހު ވެސް ވިދާޅުވީ، ނަޝީދާއެކު އޮންނަ ގުޅުމަކީ ވަރަށް ޒަމާންވީ ގުޅުމެއް ކަމަށެވެ.

"އަބަދުވެސް ހުރޭ ހިޔާލުތަފާތުވުން ކަންތައްތަކުގައި، އޭގެ ތެރެއިން އެކީގައި ކުރިއަށް ދެވޭނެ ގޮތް ހޯދަން އަބަދުވެސް. ހޯދައިގެން މިހާ ހިސާބަށް މި އާދެވުނީ،" ސޯލިހު ވިދާޅުވި އެވެ.

އެއާ އެކު ނޫސްވެރިން މިއަދު ވަނީ ދެން އޮންނަ ރިޔާސީ އިންތިހާބެއްގައި އެމްޑީޕީން ނެރޭނެ ކެންޑިޑޭޓަކާމެދު ސުވާލުކޮށްފަ އެވެ.

ނަމަވެސް، ތަކުރާރުކޮށް ސުވާލުކުރުމުންވެސް އެކަމާ ގުޅޭގޮތުން ދެ ބޭފުޅުން ވެސް ވަކި އެއްޗެއް ވިދާޅެއް ނުވި އެވެ. 

"ރިޔާސީ އިންތިޚާބުގެ ކެންޑިޑެންސީގެ ވާހަކަ ދައްކަން އަދި މާ އަވަސް. އެހެންވީމަ އެ ވާހަކަ ބާއްވާފަ އަޅުގަނޑުމެން ކުރިއަށް ދާނީއޭ،" ސޯލިހު ވިދާޅުވި އެވެ.

ނަޝީދު ވެސް ވިދާޅުވީ، ކެންޑިޑެސީގެ ވާހަކަ ދައްކަން އަދި މާ އަވަސް ކަމަށާއި، އެ ވާހަކަ ދައްކަންޖެހޭ ވަގުތު ޖެހުމުން އެ ވާހަކަ ދައްކަވާނެ ކަމަށެވެ.