ޓޫރިޒަމް އެނދު 67,053 އަށް | މި އަހަރު 3،800ގެ އިތުރުވުމެއް

މި އަހަރުގެ މިހާތަނަށް ރާއްޖޭގައި ހުރި ޓޫރިޒަމް އެނދުގެ އަދަދު 67،000 އަށްވުރެ މަތިވެފައިވާއިރު، މި އަހަރު  3،800 އަށްވުރެ ގިނަ އެނދު އިތުރުވުމެއް ލިބިފައިވާ ކަމަށް ދައްކައިފި އެވެ. 

ޓޫރިޒަމް މިނިސްޓްރީގެ ހިސާބުތައް ދައްކާ ގޮތުން މި އަހަރުގެ މިހާތަނަށް 67,053 އެނދު ވަނީ ޓޫރިޒަމްގައި އުފެދިފަ އެވެ. މިއީ މި އަހަރު ފެށުނުއިރު ހުރި 63,248 އެނދާ އަޅާބަލާއިރު ގާތްގަނޑަކަށް 3،800 އެނދު އިތުރުވުމެކެވެ. 

މި އަހަރުވެސް ރާއްޖޭގައި ދުނިޔޭގެ މަޝްހޫރު ގިނަ ރިސޯޓް ބްރޭންޑްތަކެއް ހުޅުވާފައިވެ އެވެ. މި އަހަރުގެ މިހާރަނަށް ހަތަރު ރިސޯޓެއް ހުޅުވާފައިވެ އެވެ. މިގޮތުން ހުޅުވި ރިސޯޓްތަކުގެ ތެރޭގައި މެންޑަރިން އޮރިއެންޓަލް، މޯލްޑިވްސް އާއި ބަލްގަރީ ރިސޯޓް މޯލްޑިވްސް އަދި ޒަމާނީ އައިލެންޑުގެ އިތުރުން ކޮރިންތިއާ މޯލްޑިވްސް ހިމެނެ އެވެ. 

މި އަހަރުގެ މިހާތަނަށް ރާއްޖޭގައި މިހާރު އެންމެ ބޮޑަށް އިތުރުވަމުން ދަނީ ގެސްޓްހައުސްތަކުގެ އެނދުތަކެވެ. މި އަހަރު ފެށުނުއިރު ރާއްޖޭގައި ހުރީ 929 ގެސްޓްހައުސް އެވެ. ނަމަވެސް މިހާރު ގެސްޓްހައުސްތަކުގެ އަދަދު ވަނީ 960 އަށް އިތުރުވެފަ އެވެ. އަދި މި ވަގުތު ގެސްޓްހައުސްތަކުގައި ޖުމްލަ  16,610 އެނދު ހުރިކަމަށް ދައްކަ އެވެ. އަދި މި އަހަރު ފެށުނުއިރު ރާއްޖޭގައި 155 ސަފާރީ އޮތްނަމަވެސް މިހާރު މި އަދަދު ވަނީ 167 އަށް އިތުރުވެފަ އެވެ. މ އަހަރު 12 އެނދު ވަނީ އިތުރުވެފަ އެވެ.