މިރާއަށް ދައްކަންޖެހޭ ޓެކްސްތައް، އަމިއްލަ ވިޔަފާރިތަކަށް ސަރުކާރުން ދޭންޖެހޭ ފައިސާއިން އަޅާ ކަނޑަނީ

ވިޔަފާރިތަކުން މިރާއަށް ދައްކަންޖެހޭ ޓެކުހާއި އެހެނިހެން ފީތައް، އެ ކުންފުނިތަކަށް ސަރުކާރުން ދޭންޖެހޭ ފައިސާ އަޅާ ކެނޑޭނެ ނިޒާމު އިތުރަށް ފުޅާކުރެވޭނެ މަގުތަކެއް ހޯދައި ދެއްވާނެކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ. 

ކުދި ވިޔަފާރިތަކާ އެކު ރައީސް މުއިއްޒު މިރޭ ބޭއްވެވި ބައްދަލުވުމުގައި، ގިނަ ވިޔަފާރިތަކުގެ މައިގަނޑު ޝަކުވާއަކަށްވީ، ސަރުކާރާއި ސަރުކާރުގެ ކުންފުނިތަކަށް ކޮށްދީފައިވާ މަސައްކަތްތަކަށް ފައިސާ ނުލިބޭ މައްސަލަ އެވެ. 

މިގޮތުން، ކުރީގެ ސަރުކާރުގައި ކުރި މަސައްކަތްތަކަށް ވެސް އަދިވެސް ފައިސާ ނުލިބޭ ކަމަށާއި، ވިޔަފާރި ހުއްޓައިލަންޖެހޭ ހިސާބަށް ކަންކަން ގޮސްފައިވާ ކަމަށް އެ މީހުން ބުންޏެވެ. 

ނަމަވެސް، ސަރުކާރުން ފައިސާ ނުލިބުނަސް، ގަވާއިދުން މިރާއަށް ޖީއެސްޓީ އާއި އެހެނިހެން ފީތައް ދައްކަންޖެހޭ ކަމަށާއި، އެއީ އިންސާފެއް ނޫންކަމުގެ ޝަކުވާ ރައީސް އާ ހިއްސާކުރި އެވެ.

"އެހެންވީމާ އަޅުގަނޑުގެ އެދުމަކީ ސަރުކާރުގެ އެސްއޯއީތަކުން ވެސް އަމިއްލަ ވިޔަފާރިތަކަށް ދައްކަން ހުރި ފައިސާއިން މީރާއަށް ދައްކަން ޖެހޭ ޓެކްސް ލާޖައްސައި އުނިކުރެވޭނެ އިންތިޒާމެއް ގާނޫނުގެ ތެރެއިން ހަމަޖައްސައިދެއްވުން،" ވިޔަފާރިއަކު ރައީސްގެ އަރިހުން އެދުނެވެ.

އެ ކަންބޮޑުވުމާ ގުޅިގެން ރައީސް ވިދާޅުވީ، މިރާ އާއެކު މަޝްވަރާކޮށް، އެ އިދާރާއަށް ދައްކަންޖެހޭ ޓެކުހުން ސަރުކާރުން ދޭންޖެހޭ ފައިސާ އަޅާ ކަނޑޭ ގޮތަށް އޮތް ނިޒާމު އިތުރަށް ފުޅާކުރެވޭނެ ގޮތްތައް ބަލާ ދެއްވާނެ ކަމަށެވެ. 

އެ މަނިކުފާނު އިތުރަށް ވިދާޅުވި ގޮތުގައި، އަމިއްލަ ވިޔަފާރިތަކަށް ސަރުކާރުން ދޭންޖެހޭ ފައިސާ ދިނުމުގެ މަސައްކަތް ދަނީ ކުރެވެމުންނެވެ.

މިގޮތުން، އެ މަނިކުފާނު މީގެކުރިން އިއުލާނުކުރައްވާފައިވާ ގޮތަށް، މި މަސް ނިމުމުގެ ކުރިން ފައިސާ ނުލިބިތިބި ގިނަ ވިޔަފާރިތަކަށް، އެ ފައިސާ ލިބިގެންދާނެ ކަމަށް ވިދާޅުވި އެވެ.