ދަންވަރު މަގުމަތީގައި އުޅޭ ބިދޭސީން ހުއްޓުވައި، ސުވާލުކުރަން ފުލުހުންނަށް އަންގަވައިފި

ރާއްޖޭގައި އުޅޭ ބިދޭސީންގެ ތެރެއިން ބައެއް މީހުން ރޭގަނޑުގެ ދަންގަޑިތަކުގައި ރަށުތެރޭގެ އާންމު މަސްލަހަތު ގެއްލޭ ފަދަ ކަންކަން ކުރަމުންދާކަމުގެ ޝަކުވާއާއެކު، މިރެއިން ފެށިގެން އެ މީހުން ހުއްޓުވައި ސުވާލު ކުރަން ކަމާ ގުޅޭ އިދާރާތަކަށް ރައީސް ޑރ. މުހައްމަދު މުއިއްޒު އަންގަވައިފި އެވެ.

އެކްސްގައި ކުރެއްވި ޕޯސްޓެއްގައި، ރައީސް ވިދާޅުވީ ދަންވަރު ވަގުތުތަކުގައި ރަށުތެރޭގެ އާންމު މަސްލަހަތު ގެއްލޭ ފަދަ ކަންކަންކޮށް، އިޖުތިމާއީ މިންގަނޑުތަކާ ހިލާފަށް ބައެއް ބިދޭސީން އުޅެމުންދާތީ, ދަންވަރު 12:00 އިން ހެނދުނު 6:00 އާ ހަމައަށް އާންމު ތަންތަނުގެ އިތުރުން މަގުމަތީގައި އުޅޭ ބިދޭސީން ހުއްޓުވައި، ސުވާލު ކުރަން އެދިވަޑައިގެންފައިވާ ކަމަށެވެ.

ރައީސް ވިދާޅުވީ، އާންމު މަސްލަހަތު ގެއްލޭ ގޮތަށް އަމަލުކުރާ މީހުންގެ ފަރާތުން ފާހަގަވާ ކަންކަމާ ގުޅިގެން ގާނޫނީ ގޮތުން ފިޔަވަޅެއް އަޅަންޖެހޭ ނަމަ އެ ފިޔަވަޅެއް އެޅުމަށް ވެސް ފުލުހުންނާއި ކަމާ ބެހޭ އިދާރާތަކަށް ދަންނަވާފައި ވާނެ ކަަމަށެވެ.

ބިދޭސީންގެ ފަރާތުން މިފަދަ ކަންކަން ފެންނަކަމުގެ ޝަކުވާ ރައީސަށް ހުށަހެޅީ، ރޭ ގަލޮޅު ރައްޔިތުންނާ ބައްދަލުކުރައްވަން އެ މަނިކުފާނު ބޭއްވެވި ބައްދަލުވުމުގައި އެ އަވަށުގެ ބައެއް ރައްޔިތުންނެވެ.