އެޗްޑީސީ މުވައްޒަފުންނަށް މިއަހަރު ބޯނަހުގެ ގޮތުގައި 18،600ރ.

ހުޅުމާލެ ބަލަހައްޓާ ކުންފުނި، އެޗްޑީސީ މުވައްޒަފުންގެ ބޯނަސް މިދިޔަ އަހަރަށްވުރެ ބޮޑު ކުރަން ނިންމައިފި އެވެ.

އެޗްޑީސީ މުވައްޒަފުންނަށް މިދިޔަ އަހަރު ބޯނަހުގެ ގޮތުގައި މިދިޔަ އަހަރު ވަނީ 10،000ރ. ދީފަ އެވެ. ނަމަވެސް މި އަހަރު ބޯނަހުގެ ގޮތުަގައި ދޭން އެ ކުންފުނިން ކަނޑައަޅާފައިވަނީ 18،600ރ. އެވެ. އެހެންވެ މިއީ ބޮޑު އިތުރުވުމެކެވެ.

 
މި ބޯނަސް ދޭން އެ ކުންފުނިން ނިންމާފައިވަނީ މުވައްޒަފުންގެ ހިދުމަތަށް ރިޔާއަތްކޮށްގެންނެވެ. އަދި މި ބޯނަސް އެ ކުންފުނިން ބަހަނީ ފިނޭންސް މިނިސްޓްރީން ހުއްދަ ލިބިގެންނެވެ.

ސަރުކާރު އެސްއޯއީތަކުގެ ތެރޭން އެންމެ ބޮޑު އެސެޓެއް އޮތް އެއް ކުންފުންޏަކީ އެޗްޑީސީ އެވެ. އަދި އެ ކުންފުންޏަކީ ރާއްޖޭގެ އެންމެ ބޮޑު އުމްރާނީ ތަރައްގީގެ މަަޝްރޫއު ކަމަށްވާ ރަސްމާލެ މަޝްރޫއުވެސް ބަލަހައްޓާ ކުންފުންޏެވެ. މި މަޝްރޫއާއެކު އެޗްޑީސީގެ އެސްޓުގެ އަދަދު ވަނީ ބޮޑުތަނުން އިތުރުވެފަ އެވެ.
 
އެޗްޑީސީ މުވައްޒަފުންނަށް ބޯނަސް ކަނޑައަޅާފައިވާއިރު، ޕްރައިވެޓަައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ) އިން އާންމުކޮށްފައިވާ ސަރުކާރު ކުންފުނިތަކުގެ އަހަރީ ރިޕޯޓުން އެނގޭ ގޮތުގައި މިއަހަރުގެ ފުރަތަމަ ކުއާޓަރުގައި އެޗްޑީސީ ހިންގާފައި ވަނީ ގެއްލުމުގަ އެވެ.

އެގޮތުން މިދިޔަ އަހަރު ޖުމުލަ އާމްދަނީގެ ގޮތުގައި ލިބުނީ 3.5 ބިލިއަން ރުފިޔާ އެވެ. އެއީ އޭގެ ކުރީ އަހަރު ލިބުނު އާމްދަނީއާ އަޅައިބަލާއިރު 50 ޕަސެންޓް ދަށް އަދަދެކެވެ.