ހައިކޯޓުގެ ފަނޑިޔާރު ކަމަށް ހުޅުވާލައިފި

ހައިކޯޓުގެ ފަނޑިޔާރު ކަމުގެ މަގާމަށް ކުރިމަތި ލުމަށް މިއަދު ހުޅުވާލައިފި އެވެ.

ޖުޑީޝަލް ސާވިސް ކޮމިޝަން (ޖޭއެސްސީ) އިން ކުރި އިއުލާނެއްގައި ބުނެފައި ވަނީ ހައިކޯޓުގެ ހުސްވެފައިވާ ދެ މަގާމަށް ކުރިމަތި ލުމުގެ ފުރުސަތު މިއަދުން ފެށިގެން މިމަހުގެ 21 ވަނަ ދުވަހުގެ 12:00 ގެ ނިޔަލަށް ހުޅުވާލާފައިވާ ކަމަށެވެ.

ހައިކޯޓުގެ ފަނޑިޔާރުކަމަށް ކުރިމަތިލުމަށް ހުޅުވާލާފައި ވަނީ އެ ކޯޓުގެ ފަނޑިޔާރުކަމުގައި ހުންނެވި މުހައްމަދު ނިޔާޒު ރިޓަޔާކުރެއްވުމާއި ފަނޑިޔާރުކަމުގައި ހުންނެވި މުހައްމަދު ފައިސަލް އިސްތިއުފާދެއްވުމާ ގުޅިގެންނެވެ.

ޖޭއެސްސީގެ އިއުލާނުގައިވާ ގޮތުގައި އެ މަގާމުގެ އަސާސީ މުސާރައަކީ 45،700 ރުފިޔާ އެވެ. ލިވިން އެލަވަންސްގެ ގޮތުގައި 18,000 ރުފިޔާ އަދި ރިސްކް އެލަވަންސްގެ ގޮތުގައި 3،300 ރުފިޔާ ލިބޭނެ އެވެ. އޭގެ އިތުރު މެޑިކަލް އަދި ފޯނު އިންޝުއަރެންސް ވެސް ލިބޭނެ އެވެ.

ހައިކޯޓުގައި ޖުމްލަ 11 ފަނޑިޔާރުން ތިބޭއިރު މިވަގުތު އެކޯޓުގައި ތިބީ ނުވަ ފަނޑިޔާރުންނެވެ.