ހެލިކޮޕްޓަރުގެ ހިދުމަތް ދޭނެ ބަޔަކު ހޯދަން އަލުން އިއުލާނު ކޮށްފި

ރާއްޖޭގައި ހެލިކޮޕްޓަރުގެ ހިދުމަތް ދިނުމަށް ޝައުގުވެރިވާ ބަޔަކު ހޯދަން ޓްރާންސްޕޯޓް މިނިސްޓްރީން އަނެއްކާ ވެސް އިއުލާންކޮށްފި އެވެ.

ހެލިކޮޕްޓަރުގެ ހިދުމަތް ދޭނެ ބަޔަކު ހޯދުމަށް އިއްޔެ ޓްރާންސްޕޯޓް މިނިސްޓްރީން ކުރި އިއުލާނުގައި ބުނީ، ހެލިކޮޕްޓަރުގައި އެއާ އެމްބިއުލާންސްގެ ހިދުމަތް ދިނުމާއި، ސާޗް އެންޑް ރެސްކިއު އޮޕަރޭޝަންތަކުގައި އެހީވުމުގެ އިތުރުން ވިޔަފާރިގެ އުސޫލުން ފަސިންޖަރުން އުފުލުމަށްޓަކައި ޓޫރިޒަމްގެ ދާއިރާގައި ހެލިކޮޕްޓަރު ބޭނުން ކުރުމަށް 10 އަހަރުގެ އެކްސްކުލޫސިވިޓީއެއް ލިބޭނެ ކަމަށެވެ.

އަދި އެ މުއްދަތުގައި އެހެން އެއްވެސް ކުންފުންޏަކަށް އެ ހިދުމަތް ދިނުމުގެ ހުއްދަ ނުދޭނެ ކަމަށް އިއުލާނުގައި ވެ އެވެ.

އެ އިއުލާނުގައިވާ ގޮތުގައި، ރިކުއެސްޓް ފޯ ޕްރޮޕޯސަލް (އާރުއެފްޕީ) ހުށަހެޅޭނެ އެންމެ ފަހު ތާރީހަކީ މި މަހުގެ 25 ވަނަ ދުވަހެވެ. އެ އާރުއެފްޕީގައި ބުނީ ހިދުމަތް ދިނުމަށް ހޮވާ ކުންފުނިން މަހަކު 80-150 ގަޑިއިރު އެއްވެސް އަގަކާ ނުލާ މެޑިކަލް އަދި ސާޗު އެންޑް ރެސްކިޔު އޮޕަރޭޝަންތަކަށް ހިދުމަތް ދޭންވާނެ ކަމަށެވެ. އަދި ކުއްލި ހާލަތްތަކުގައި އަބަދުވެސް ހެލިކޮޕްޓަރު އޮޕަރޭޓް ކުރަން ތައްޔާރަށް އޮންނަން ވާނެ ކަމަށެވެ.

މީގެ ކުރިން މި ހިދުމަތަށް ހުޅުވައިލުމުން 32 ކުންފުނިން ވަނީ ޝައުގުވެރިކަން ފާޅުކޮށްފަ އެވެ. ނަމަވެސް ޓްރާންސްޕޯޓް މިނިސްޓަރު މުހައްމަދު އަމީން މީގެ ކުރިން ވިދާޅުވެފައި ވަނީ ހެލިކޮޕްޓަރުގެ ހިދުމަތް ފަށަން ޝައުގުވެރިވާ ކުންފުނިތަކަށް ފުރުސަތު ހުޅުވާލިއިރު އިއުލާނުކުރީ ދައުލަތަށް އެންމެ ފައިދާވާނެ ގޮތަށް ސާޗް އެންޑް ރެސްކިއުއާއި މެޑިކަލް އިވެކުއޭޝަންގެ ވަކި ހިދުމަތްތަކެއް ހިލޭ ދޭ ގޮތަށް ކަމަށެވެ.

ނަމަވެސް ދައުލަތަށް އެންމެ ބޮޑު ފައިދާއެއް ލިބޭ ގޮތަށް ޕްރޮޕޯސަލް ހުޅުވާލުމުން ދައުލަތަށް ނަގާ ބައި ބޮޑުކަމަށް ކުރިމަތިލި ކުންފުނިތަކުން ފާހަގަކޮށްފައިވާތީ އިއުލާނު ބާތިލު ކުރީ ކަމަށް އޭނާ ވިދާޅުވެފައިވެ އެވެ.

ރާއްޖޭގައި މީގެ 13 އަހަރު ކުރީން ވެސް ހެލްކޮޕްޓަރުގެ ހިދުމަތް ދިނެވެ. ހަމިންބާޑް އައިލެންޑް އެއާވޭސް ކުންފުނިން ދެމުން ދިޔަ އެ ހިދުމަތް ހުއްޓާލަން ޖެހުނީ ހެލްކޮޕްޓަރު ވެއްޓުމުގެ ދެ ހާދިސާއެއް ހިނގާ ގިނަ ބަޔަކު މަރުވުމާއި ގުޅިގެންނެވެ.

ރާއްޖެއަށް އިންޑިއާ ސަރުކާރުން ހަދިޔާ ކޮށްފައިވާ ހެލިކޮޕްޓަރެއް އޮޕަރޭޝަންގައި އެބަ އޮތެވެ. ކުރިން ބަލި މީހުން އުފުލަން ބޭނުންކުރީ މި އުޅަނދެވެ. ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ހެލިކޮޕްޓަރުގެ ބަދަލުގައި އެއާ އެމްބިއުލާންސް ފަށައިފަ އެވެ.