ބޮޑު ހިތާމައެއްގެ ތެރޭން މޭޔަރު ސިޔާސީ ފައިދާ ނެގުން ބަލައެއް ނުގަންނަން: މިއުވާނު

ދިހަ މީހުން މަރުވެދިޔަ ހިތާމެވެރި، އަލިފާނުގެ ބޮޑު ހާދިސާއެއްގެ މެދުތެރެއިން މާލޭ ސިޓި ކައުންސިލާއި މާލޭގެ މޭޔަރު ޑރ. މުހައްމަދު މުއިއްޒު ސިޔާސީ ފައިދާ ނަންގަވަން މަސައްކަތް ކުރެއްވުން އެއްގޮތަކަށް ވެސް ބަލައި ނުގަނެވޭ ކަމަށް ސަރުކާރުން ބުނެފި އެވެ.

ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ "އެތައް ބަޔަކު މަރުވެ، ވަރަށް ހިތާމަވެރި ހާދިސާއެއް ހިނގައިގެން މުޅި ގައުމު ހިތާމައެއްގައި އޮއްވާ އަދި އިދާރާތަކުން މި ހާދިސާ ތަހުގީގު ކުރަމުން ދާއިރު، މިކަން ސިޔާސީކޮށް އެކަކު އަނެކަކު ބަދުނާމު ކުރުން ބަލައި ނުގަނެވޭ" ކަމަށެވެ.

ތަރުޖަމާނު ވިދާޅުވީ މިފަދަ ކަންކަން މެދުވެރި ވުމުން ނަގަން ޖެހިދާނެ ޒިންމާއަކުން ރެކެން ކުރީ ބައިގައި މަސައްކަތް ކުރަން ފެށުމަކީ ބަލައިގަނެވޭނެ ކަމެއް ނޫން ކަމަށާއި ރޭގެ ހާދިސާގައި ކަން ހިނގި ގޮތް ސާފުވުމުން އެކަމުގައި ޒިންމާވާން ޖެހެނީ ކޮން ބައެއްކަން ވެސް އަދި އެ ކަމުގެ އިހުމާލު އޮތީ ކޮން ބައެއްގެކަން ވެސް ސާފު ވެގެން ދާނެ ކަމަށެވެ.

މިއުވާން ރައްދެއް ދެއްވާފައި އެވަނީ ރޭގެ އަލިފާނުގެ ހާދިސާއާ ގުޅިގެން ސިޓީ ކައުންސިލުން މިއަދު ދައްކާފައިވާ ވާހަކަތާ ގުޅުވަ އެވެ.

މާލޭގައި ރޭ ގަރާޖެއް ހިންގި އިމާރާތެއްގައި ބޮޑު އަލިފާނެއް ރޯވެ 10 މީހުން މަރުވެފައިވާއިރު މާލޭގައި ހިންގާ ގަރާޖުތަކާއި ވޯކްޝޮޕްތައް މާލޭގެ އިންޑަސްޓްރިއަލް ޒޯނަށް ގެންދަން ސިޓީ ކައުންސިލުން ކުރި މަސައްކަތް ހުއްޓުވީ ސަރުކާރުން ކަމަށް ކައުންސިލުން މިއަދު ވަނީ ބުނެފަ އެވެ.

ކައުންސިލްގެ ސްޕޯކްސްޕާސަން މަރިޔަމް ޝިއުނާ ވިދާޅުވި ގޮތުގައި ކުރިން އޮތް ކައުންސިލާއި މިހާރުގެ ކައުންސިލުން ވެސް މާލޭގެ ގަރާޖުތައް ބަލައި މޮނިޓާކޮށް ސާވޭ ހަދައި މައުލޫމާތުތައް އެއް ކުރި އެވެ. އަދި ސާވޭން ސާބިތު ކުރެވުނު ކަންކަމުގައި އޮތް ކަންބޮޑުވުންތައް ސަރުކާރާ ހިއްސާ ކުރުމާއެކު އެތަންތަން އިންޑަސްޓްރިއަލް ވިލެޖަށް ގެންދަން މަސައްކަތް ފެށި އެވެ. ނަމަވެސް ޕްލޭނިން މިނިޓްރީން ހުއްޓުވައި ބިންތައް ވެސް ސަރުކާރަށް ނެގީ އެވެ.

ސަރުކާރުން އެ ގޮތަށް އަމަލު ކުރީ ތިލަމާލެ ބްރިޖްގެ މަޝްރޫއަށް ކަމަށް ބުނެ އެވެ. ޝިއުނާ ވިދާޅުވީ އެފަހަރު އިންޑަސްޓްރިއަލް ވިލެޖުގެ ބިން ކައުންސިލްގެ ބެލުމުގެ ދަށުން ނެގުމުން ފަޅުމަތީ މަގުގައި ހުސްކޮށް ހުރި ބިންތަކުން ހުރި ގަރާޖު އަދި ވޯކްޝޮޕްތައް ބަދަލު ކުރުމަށް މަސައްކަތް ފެށުމުން އެކަމް ވެސް ހުއްޓުވީ ކަމަށެވެ.

ސިޓީ ކައުންސިލުން މިއަދު މާލޭގެ ގަރަޖްތަކުގެ ސާވޭއެއް ވެސް ވަނީ އާންމު ކޮށްފަ އެވެ. އޭގައި ބުނާ ގޮތުން މާލޭގައި ޖުމްލަ 276 ގަރާޖަކާއި ވޯކްޝޮޕަކާއި ގުދަން ހިންގަ އެވެ. އަދި މާލޭގެ މާފަންނުގައި އެފަދަ 132 ތަނެއް ހިންގައެވެ. ހެންވޭރުގައި 52 ތަނެއް ހިންގާއިރު ގަލޮޅުގައި 53 ތަނެއް މައްޗަންގޯޅީގައި 39 ތަނެއް ހިންގައެވެ. މާލޭގައި ގަރާޖުގެ ގޮތުގައި 107 ތަނެއް ހިންގާއިރު ވޯކްޝޮޕްތަކުގެ ގޮތުގައި 70 ތަނެއް ހިންގަ އެވެ. ގުދަނުގެ ގޮތުގައި 80 ތަނެކެވެ. ވަޑާންގޭގެ ގޮތުގައި 19 ތަނެކެވެ.