ޕްރައިވެޓް ސެކްޓަރުގެ ވިޔަފާރިއަށް ދޫކުރި ލޯނު 7.2 ޕަސެންޓް މައްޗަށް

ރާއްޖޭގެ ބޭންކްތަކާއި މާލީ އިދާރާތަކުން އަމިއްލަ ސިނާއަތްތަކަށް ދޫކުރި ލޯނުގެ އަދަދު 7.2 ޕަސެންޓް އިތުރު ވެއްޖެ އެވެ. 

މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ މައުލޫމާތުތައް ދައްކާ ގޮތުން މި އަހަރުގެ އޮކްޓޫބަރު މަހުގެ ނިޔަލަށް ޕްރައިވެޓް ސެކްޓަކަށް ޖުމްލަ 40,5 ބިލިއަން ރުފިޔާ އަށް ވުރެ ބޮޑު އަދަދެއް ވަނީ ލޯނު ދީފަ އެވެ. މިއީ މިދިޔަ އަހަރުގެ މި މުއްދަތުގެ ނިޔަލަށް ދޫކޮށްފައިވާ 35 ބިލިއަން ރުފިޔާގެ ލޯނާ އަޅާ ކިޔާނަމަ 7.2 ޕަސެންޓުގެ އިތުރުވުމެކެވެ. 

މައުލޫމާތުތަކުން އެނގޭ ގޮތުގައި އަމިއްލަ ވިޔަފާރިތަކަށް ދޫކުރި ލޯނުތައް ހުރިހާ ސިނާއަތްތަކެއްގައި ވަނީ ބޮޑުތަނުން އިތުރުވެގެން ގޮސްފަ އެވެ. ޓޫރިޒަމް ސިނާއަތަށް މިދިޔަ އަހަރު 12 ބިލިއަން ރުފިޔާގެ ލޯނު ދިންއިރު މި އަހަރު މި އަދަދު ވަނީ 13 ބިލިއަން ރުފިޔާއަށް އިތުރުވެ 5.4 ޕަސެންޓަށް އިތުރުވެފަ އެވެ. އަދި އިމާރާތް ކުރުމުގެ ސިނާއަތަށް ދޫކުރި ލޯނުގެ އަދަދު ވަނީ 7.1 ބިލިއަން ރުފިޔާއިން 7.5 ބިލިއަން ރުފިޔާއަށް އިތުރުވެ 4.7 ޕަސެންޓުގެ އިތުރުވުމެއް އައިސްފަ އެވެ. އަދި ރިއަލް އެސްޓޭޓް ވިޔަފާރިތަކަށް ދޫކުރި ލޯނުގެ އަދަދު ވަނީ 2.8 ބިލިއަން ރުފިޔާއިން 4.4 ބިލިއަން ރުފިޔާއަށް އިތުރުވެ ފަސް ޕަސެންޓުގެ އިތުރުވުމެއް އައިސްފަ އެވެ. 

ނަމަވެސް ކޮމާޝަލް ވިޔަފާރިތަކަށް ދިން ލޯނުގެ ނިސްބަތް ވަނީ 4.1 ބިލިއަން ރުފިޔާއިން 3.2 ބިލިއަން ރުފިޔާއަށް ދަށްވެފަ އެވެ. އަދި މަސްވެރިކަމަށް ދޫކުރި ލޯނުވެސް ވަނީ 503.2 މިލިއަން ރުފިޔާއިން 477.7 މިލިއަން ރުފިޔާއަށް ދަށްވެފަ އެވެ. 

މައުލޫމާތުތަކުން އެނގޭ ގޮތުގައި ޕްރައިވެޓް ސެކްޓަރަށް ބޭންކްތަކުން ދޭ ލޯނުގެ 33.6 ޕަސެންޓް ހިއްސާ ކުރަނީ ޓޫރިޒަމް ސެކްޓަރުންނެވެ. އަދި މި އަހަރުގެ އޮކްޓޫބަރު މަހުގެ ނިޔަލަށް 2023 ވަނަ އަހަރާ އަޅާ ކިޔާނަމަ އިމާރާތްކުރުމުގެ ދާއިރާއަށް ދޫކުރި ލޯނު ދަށްވެފައި ވީނަމަވެސް، ރިއަލް އެސްޓޭޓް އަދި ޓޫރިޒަމަށް ދޫކުރާ ލޯނުގެ ޢަދަދު ވަނީ އިތުރުވެފަ އެވެ.