ތޫފާނުގައި ލަންކާއިން މަރުވި މީހުންގެ އަދަދު 400 އިން މައްޗަށް

ބޭ އޮފް ބެންގާލްގައި އުފެދުނު ބާރުގަދަ ތޫފާން، ތޫފާން ޑިޓުވާގައި ސްރީލަންކާއަށް ކުރި ވިއްސާރައިގައި ފެންބޮޑުވެ ހިނގި އެކި ހާދިސާތަކުގައި އެ ގައުމުގެ 410 މީހުން މަރުވެ، 300 އަށްވުރެ ގިނަ މީހުން ގެއްލިފައިވާ ކަމަށް އެ ގައުމުގެ ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ބުނެފި އެވެ.

މި ހާދިސާގެ ސަބަބުން އެންމެ ބޮޑަށް ގެއްލުން ވެފައި ވަނީ އެ ގައުމުގެ އައްސޭރިފަށުގައި ހުރި ސަރަހައްދުތަކަށެވެ. ދިވެހިން އެންމެ ގިނައިން ގޮސްއުޅޭ ކޭންޑީ ސަރަހައްދަށް ވެސް ބޮޑެތި ގެއްލިންތައްވެ، 88 މީހުން މަރުވެފައިވާއިރު 150 މީހުން ވަނީ ގެއްލިފަ އެވެ. ޖުމްލަ މި ހާދިސާގައި މިހާތަނަށް 366 މީހުން ގެއްލިފައިވާ ކަމަށް ޑީއެމްސީން ބުނެފައިވެ އެވެ.

މި ތޫފާނުގެ ސަބަބުން ލަންކާގެ 25 ހިސާބަކުން 1.4 މީލިއަން މީހުންނަށް ގެއްލުން ވެފައިވާ ކަމަށް ޑީއެމްސީން ރިޕޯޓުކޮށްފައިވެ އެވެ.

ފަހުގެ ތާރީހެއްގައި މި ސަރަހައްދަށް ދިމާވި އެންމެ ބޮޑު ގުދުރަތީ މި ކާރިސާގައި ލަންކާގެ 20،000 އެއްހާ ގެ ވަނީ ނޫޅެވޭ ވަރަށް ހަލާކުވެފަ އެވެ. އަދި 60،000 އަށްވުރެ ގިނަ މީހުންނަށް ވަނީ ވަގުތީ ބޯހިޔާވަހިކަން ފޯރުކޮށްދީފަ އެވެ.

އެ ގައުމުގައި މިހާރު ވަނީ އެތައް ސަތޭކަ ވޮލެންޓިއަރުންނެއް ނުކުމެ އެހީތެރިކަން ފޯރުކޮށްދެމުންނެވެ. ވިއްސާރަ އަލިވުމުން މަގުތަކުން ފެން ހިންދުމާއި، މަގުތައް ސާފުކުރުމުގެ މަސައްކަތް ދަނީ ކުރަމުންނެވެ. އޭގެ އިތުރުން ގެއްލުން ލިބުނު މީހުންނަށް ކާބޯތަކެތި ފޯރުކޮށްދިނުމުގެ މަސައްކަތް ވެސް ދަނީ ކުރަމުންނެވެ.

ލަންކާއަށް އެހީތެރިވުމުގެ ގޮތުން ދިވެހި ސަރުކާރުން ދޭން ނިންމި 50،000 ޑޮލަރާއި 25،000 މަސްދަޅު މިހާރު ވަނީ އެ ގައުމުގެ ސަރުކާރާ ހަވާލުކޮށްފަ އެވެ. އަދި ރާއްޖޭގައި ހިންގި ޓެލެތޯނުން ލިބުނު 800،352 ޑޮލަރު (12.3 މިލިއަން ރުފިޔާ) ރާއްޖޭގެ ފޮރިން މިނިސްޓްރީއާ އިއްޔެ ވަނީ ހަވާލުކޮށްފަ އެވެ.