ފިހުނު ސްޓެލްކޯގެ މުވައްޒަފު އިތުރު ފަރުވާއަށް ތައިލެންޑަށް ގެންގޮސްފި

ހުޅުމާލެ ބާ އިންޖީނު ގޭގައި މިދިޔަ ބުދަ ދުވަހު ހިނގި ހާދިސާއެއްގައި ފިހުނު ސްޓެލްކޯގެ މުވައްޒަފު އިތުރު ފަރުވާ އަށް ތައިލެންޑަށް ގެންގޮސްފި އެވެ.

ހުޅުމާލޭ ބާ އިންޖީނުގޭގެ ސްވިޗްގިއާއަކަށް ދިމާވި މައްސަލައެއް ޙައްލުކުރުމުގެ މަސައްކަތް ކުރަމުން ދަނިކޮށް، ހިނގައިދިޔަ އެ ހާދިސާގައި ސްޓެލްކޯގެ އުމުރުން 43 އަހަރުގެ އެ މުވައްޒަފު ހަށިގަނޑުގެ އެކި ތަންތަން ފިހި، ސީރިއަސް އަނިޔާތަކެއް ވަނީ ލިބިފަ އެވެ. އޭނާ އަކީ ސްޓެލްކޯގައި މަސައްކަތް ކުރާ ތަޖުރިބާކާރު އިންޖިނޭރެކެވެ.

ސްޓެލްކޯ އިން މިއަދު ބުނީ އެ މުވައްޒަފު އިތުރު ފަރުވާއަށް، ތައިލެންޑްގެ ބެންކޮކް ހޮސްޕިޓަލަކަށް ބަދަލުކޮށްފައިވާ ކަމަށެވެ.

" އަޅުގަނޑުމެންގެ ދުއާ އަކީ އެ މުވައްޒަފަށް އަވަސް ޝިފާއެއް ލިބި، އަލުން ހެޔޮ ހާލުގައި ވަޒީފާއަށް ނިކުމެވުމުގެ ތައުފީގު މާތް ﷲ ދެއްވެވުން،" ސްޓެލްކޯ އިން ބުންޏެވެ.

އެ ހާދިސާއާ ގުޅޭ ގޮތުން އެ ކުންފުނިން ކުރިން ނެރުނު ބަޔާނެއްގައި ބުނެފައި ވަނީ އެ ހާދިސާއާއި ގުޅިގެން އަނިޔާވި މުވައްޒަފުގެ ފަރުވާއާއި ގުޅޭ އެންމެހާ ކަންކަން ވަރަށް ގާތުން ބަލައި، ކުންފުނީގެ ފަރާތުން ފޯރުކޮށްދެވެން އޮތް ހުރިހާ އެހީތެރިކަމެއް ފޯރުކޮށްދިނުމަށް މުވައްޒަފުގެ އާއިލާއާއި ގުޅިގެން މަސައްކަތް ކުރަމުންދާ ކަމަށެވެ.

މި ހާދިސާ ހިނގަން މެދުވެރިވި ސަބަބު ދެނެގަނެ، މިފަދަ ހާދިސާތައް ތަކުރާރުވިޔަ ނުދިނުމަށްޓަކައި އަޅަންޖެހޭ އެންމެހައި ފިޔަވަޅުތައް އެޅުމުގެ މަސައްކަތް ކުރަމުންދާ ކަމަށް ވެސް އޭރު ބުނެފައިވެ އެވެ.