ބުރިޖު ހައިވޭގައި ޕިކަޕަކާއި ސައިކަލެއް ޖެހި ދެ މީހަކަށް އަނިޔާ

ސިނަމާލެ ބްރިޖު ހައިވޭގައި ޕިކަޕަކާއި ސައިކަލެއް ޖެހި އެކްސިޑެންޓެއް ހިނގައި، ދެ މީހަކަށް އެކިވަރުގެ އަނިޔާވެއްޖެ އެވެ.

މި އެކްސިޑެންޓް ހިނގާފައި ވަނީ މިއަދު ހެނދުނު 9:00 ހާއިރު، ހައިވޭގެ މާލޭން ހުޅުމާލެއަށް ދާ ހަތަރު ލޭނު ނިމޭ ހިސާބުގައި ސައިކަލަކާއި ޕިކަޕެއް ޖެހިގެންނެވެ.

ފުލުހުން ބުނީ މި އެކްސިޑެންޓްގައި އަނިޔާވެފައި ވަނީ ސައިކަލު ދުއްވަން އިން 28 އަހަރުގެ ދިވެހި ފިރިހެން މީހާ އަށާއި، ސައިކަލު ފަހަތުގައި އިން 22 އަހަރުގެ އިންޑިއާ އަންހެނަކަށް ކަމަށެވެ. މި ދެ މީހުންނަށް ވެސް މިހާރު ދަނީ އައިޖީއެމްއެޗުގައި ފަރުވާ ދެމުންނެވެ.

ހޮސްޕިޓަލާ ހަވާލާދީ ފުލުހުން ބުނީ، މި އެކްސިޑެންޓްގައި އަނިޔާވި ފިރިހެން މީހާގެ ކަނާއަތު ކޮނޑު ހުޅުން ނެއްޓި، އެކިވަރުގެ އަނިޔާ ލިބިފައިވާ ކަމަށެވެ. އަދި އިންޑިއާ އަންހެން މީހާގެ ގައިގެ އެކި ތަންތަން މަށައިގެން ގޮސް، އެކިވަރުގެ އަނިޔާ ލިބިފައިވާ ކަމަށެވެ.

ފުލުހުން އިތުރަށް ބުނީ މައްސަލަ ތަހުގީގު ކުރަމުންދާ ކަމަށެވެ.