ލަންކާއަށް އެހީވާން 50،000 ޑޮލަރާއި މަސްދަޅު ރާއްޖޭން ހަދިޔާކުރަން ނިންމައިފި

އަވައްޓެރި ސްރީ ލަންކާއަށް މިހާރު ކުރަމުންދާ ވިއްސާރާގައި ލިބުނު ގެއްލުންތަކަށް އެހީވާން، ރާއްޖޭން 50،000 އެމެރިކާ ޑޮލަރާއި 25،000 މަސްދަޅު ކޭސް ހަދިޔާކުރަން ނިންމައިފި އެވެ. 

ފޮރިން މިނިސްޓްރީން ނެރުނު ބަޔާނެއްގައި ބުނީ، “ޑީތުވާ” ތޫފާންގެ ސަބަބުން ސްރީ ލަންކާ ގެ އެކި ހިސާބުތަކަށް ބޯކޮށް ވާރޭވެހި އެ ޤައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ޤައުމަށް އެހީތެރިވުމުގެ ގޮތުން ނިންމި ނިންމުމެއް ކަމަށެވެ.

"މި އެހީތެރިކަން ރަމްޒުކޮށްދެނީ ދެ ޤައުމުގެ ދެމެދުގައި އޮތް ގާތް އެކުވެރި ގުޅުމާއި މިފަދަ އުނދަގޫ ދަނޑިވަޅެއްގައި އެ ޤައުމުގެ ރައްޔިތުންނާއެކު ދިވެހި ރައްޔިތުން ތިބިކަމެވެ،" ފޮރިން މިނިސްޓަރު ޑރ. އަބްދުﷲ ހަލީލް އެ ބަޔާނުގައި ވިދާޅުވި އެވެ.

"އަދި ރާއްޖެއިން އުއްމީދުކުރަނީ މި އެހީގެ ސަބަބުން ޙާލުގައި ޖެހިފައިވާ ސްރީލަންކާ ރައްޔިތުންނަށް ކޮންމެވެސް ވަރެއްގެ ތަސައްލީއެއް ލިބި، ސްރީލަންކާ ސަރުކާރުން ކުރަމުންދާ މަސައްކަތައް ކޮންމެވެސް ވަރެއްގެ ލުއިކަމެއް ލިބޭނެކަމަށެވެ."

ބޭ އޮފް ބެންގާލްގައި އުފެދުނު ތޫފާން "ދީތުވާ"ގެ ސަބަބުން ލަންކާގައި ފެންބޮޑުވެ، އެތައް ބަޔަކު ވަނީ މަރުވެފަ އެވެ. އަދި ގިނަ އާއިލާތައް ވަނީ ހާލުގައި ޖެހިފަ އެވެ.

ލަންކާއަށް އައި މި ތޫފާނުގައި މިހާތަނަށް 69 މީހަކު މަރުވެފައިވާ ކަމަށް ރިޕޯޓުތަކުން ދައްކަ އެވެ. އަދި 34 މީހަކު ވަނީ ގެއްލިފަ އެވެ. އަދި 18000 މީހުން ވަގުތީ ހިޔާތަކަށް ބަދަލުކޮށްފައިވާ ކަމަށް ލަންކާގެ ނޫސްތަކުގައިވެ އެވެ.

އެ ގައުމުގެ ސަރުކާރުން ވަނީ ބައިނަލްއަގްވާމީ އެހީއަށް ވެސް އެދިފައިވާއިރު، މިއަދުން ފެށިގެން ހަފްތާއަކަށް ކުއްލި ހާލަތު އިއުލާނު ކޮށްފަ އެވެ.