ލަންކާގައި ހަފްތާއަކަށް ކުއްލި ހާލަތު އިއުލާނު ކޮށްފި

ސްރީލަންކާއަށް މިހާރު ކުރަމުންދާ ވިއްސާރާއާ ގުޅިގެން އެގައުމަށް މިއަދުން ފެށިގެން ހަފްތާއަކަށް ކުއްލި ހާލަތު އިއުލާނު ކޮށްފި އެވެ.

ބޭ އޮފް ބެންގާލްގައި އުފެދުނު ތޫފާން "ދީތުވާ"ގެ ސަބަބުން ލަންކާގައި ފެންބޮޑުވެ، އެތައް ބަޔަކު ވަނީ މަރުވެފަ އެވެ. އަދި ގިނަ އާއިލާތައް ވަނީ ހާލުގައި ޖެހިފަ އެވެ.

ލަންކާގެ ހެލްތު މިނިސްޓަރު ޑރ އަނިލް ޖަޔަސިންހް ނެރުނު ރަސްމީ ބަޔާނެއްގައި ވަނީ މިއަދުން ފެށިގެން އަންނަ މަހުގެ ހަތަރު ވަނަ ދުވަހާ ހަމައަށް އެގައުމުގައި ކުއްލި ހާލަތު އިއުލާނު ކުރައްވާފަ އެވެ. އަދި 24 ގަޑިއިރު ސިއްހީ ހިދުމަތްދޭ ތަންތަނުން ހިދުމަތް ލިބޭނެކަން ވެސް ހާމަކުރައްވާފައިވެ އެވެ.

އަދި، ހިދުމަތްތަކަށް ފުށޫ ނާރާ ގޮތަށް ހިދުމަތް ދިނުމަށް ސިއްހީ ހިދުމަތް ދޭ ތަންތަނަށް އޭނާ ވަނީ ގޮވާލައްވާފަ އެވެ.

ލަންކާއަށް އައި މި ތޫފާނުގައި މިހާތަނަށް 69 މީހަކު މަރުވެފައިވާ ކަމަށް ރިޕޯޓުތަކުން ދައްކަ އެވެ. އަދި 34 މީހަކު ވަނީ ގެއްލިފަ އެވެ. އަދި 18000 މީހުން ވަގުތީ ހިޔާތަކަށް ބަދަލުކޮށްފައިވާ ކަމަށް ލަންކާގެ ނޫސްތަކުގައިވެ އެވެ.

އެ ގައުމުގެ ސަރުކާރުން ވަނީ ބައިނަލްއަގްވާމީ އެހީއަށް ވެސް އެދިފަ އެވެ.