ނަޝީދަށް މަރުގެ އިންޒާރު ދިން ޔާފިސް 10 އަހަރަށް ޖަލަށް

ކުރީގެ ރައީސް މުހައްމަދު ނަޝީދު މަރަން އެކި ފަހަރު މަތިން ގޮވައިލި ހ. ލައިޓްނައިޓް، އިސްމާއިލް ޔާފިސް 10 އަހަރަށް ޖަލަށްލާން ހުކުމް ކޮށްފި އެވެ.

އޭނާގެ މައްޗަށް ދައުވާ ކުރީ 2021 ވަނަ އަހަރު ސޯޝަލް މީޑިއާގެ ވަސީލަތްތައް މެދުވެރިކޮށް ނަޝީދު މަރަން ގޮވުމުންނެވެ. އެ މައްސަލައިގެ ތަހުގީގުގަ އާއި ކްރިމިނަލް ކޯޓުގެ ޝަރީއަތުގެ މަޖިލީހުގައި ވެސް އޭނާ ވަނީ ނަޝީދު މަރަން ހަމަލާ ދޭނެ ކަމަށް ބުނެ އިންޒާރު ދީފަ އެވެ.

މި މައްސަލައިގައި އޭނާގެ މައްޗަށް ތިން ދައުވާ އެއް އުފުލި އެވެ. އެއީ ޓެރަރިސްޓް ޖަމާއަތަކަށް ތާއީދު ކުރުމާއި، ޓެރަރިޒަމްގެ އަމަލެއް ހިންގާނެކަމުގެ އިންޒާރުދިނުމާއި، ޓެރަރިސްޓު އަމަލެއް ކުރުމަށް ހިތްވަރު ދިނުމުގެ ކުށުގެ ދައުވާ އެވެ.

ޕްރޮސެކިއުޓާ ޖެނެރަލް އޮފީހުގެ ތަރުޖަމާނު އަހުމަދު ޝަފީއު މިއަދު ވިދާޅުވީ މި މައްސަލައިގައި އޭނާ ކުށަށް އިއުތިރާފްވެފައިވާތީ، އޭނާއާއެކު އިއުތިރާފްގެ އެއްބަސްވުމެއް ހަދާފައިވާ ކަމަށެވެ. އެ އެއްބަސްވުމުގެ ދަށުން ކޯޓުން އޭނާއަށް އިއްޔެ 10 އަހަރުގެ ހުކުމެއް އިއްވާފައިވާ ކަމަށް ވެސް އޭނާ ވިދާޅުވި އެވެ.

ޔާފިސް ހައްޔަރު ކުރީ ނަޝީދު ރާއްޖެ ވަޑައިގެންފިނަމަ "އަބޫޖަހުލަށް ހެދިގޮތް ހަދާނަން" ކަމަށް ބުނެ ސޯޝަލް މީޑިއާގައި އިންޒާރުތަކެއް ދިނުމުންނެވެ. އެވަގުތު ނަޝީދު ހުންނެވީ އެމަނިކުފާނަށް ދިން ބޮމުގެ ހަމަލާގައި ލިބުނު އަނިޔާތަކަށް ފަރުވާ ހޯއްދަވަން ޖަރުމަނުގަ އެވެ.