ކައުންސިލަރުންގެ އަދަދު މަދުކުރާ އިސްލާހު ފާސްކޮށްފި

ކައުންސިލަރުންގެ އަދަދު މަދު ކުރުމަށް ލާމަރުކަޒީ ގާނޫނަށް ސަރުކާރުގެ ފަރާތުން އިސްލާހު ހުށަހެޅި ބިލު ރައްޔިތުންގެ މަޖިލީހުން ފާސްކޮށްފި އެވެ.

ސަރުކާރުގެ ފަރާތުން އިނގުރައިދޫ ދާއިރާގެ މެމްބަރު އިބްރާހިމް ފަލާހު ހުށަހެޅުއްވި ބިލުގައި ހުށަހަޅާފައި ވަނީ، 2،000 މީހުންނަށް ވުރެ ކުޑަ އާބާދީއެއް އޮންނަ ރަށްރަށުގައި ތިން ކައުންސިލަރުން އަދި 2،000 އަށް ވުރެ ބޮޑު އާބާދީއެއްގައި ފަސް ކައުންސިލަރުންނަށް މަދު ކުރުމަށެވެ.

އަދި ތިން ކައުންސިލަރުން ތިބޭ ރަށު ކައުންސިލްތަކުގެ އެއް ގޮނޑި އަންހެނުންނަށް ހާއްސަ ކުރަންޖެހޭއިރު، ފަސް މެންބަރުންގެ ކައުންސިލެއްގެ ދެ ގޮނޑި އަންހެންނުނަށް ހާއްސަ ކުރަންޖެހެ އެވެ.

މީގެ އިތުރުން، އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ތެރެއިން، ފުލް ޓައިމް މެންބަރެއްގެ ގޮތުގައި މަސައްކަތް ކުރާނީ، އެ ރަށެއް ނުވަތަ ސިޓީއެއްގެ ރައްޔިތުންގެ މެދުގައި ނެގޭ ސިއްރު ވޯޓަކުން އިންތިހާބު ކުރާ ރައީސް އެކަނި ކަމަށް އެ އިސްލާހުގައި ބަޔާންކޮށްފައިވެ އެވެ. ދެން ތިބޭ މެންބަރުން ކައުންސިލުގައި ފުލް-ޓައިމްކޮށް މަސައްކަތް ކުރުމަކީ އިހްތިޔާރީ ކަމެއްގެ ގޮތުގައި ބަދަލުކުރަން ވަނީ ހުށަހަޅައިފަ އެވެ.  

މީގެ ކުރީގައި 2،000 އިން ކުޑަ އާބާދީތަކުގެ ރަށްތަކުގައި ތިބެނީ ފަސް ކައުންސިލަރުންނެވެ. އަދި އެއަށްވުރެ މަތީގެ އާބާދީތަކުގައި ހަތް ކައުންސިލަރުން ތިބެ އެވެ.

މި ބިލު މިއަދު މަޖިލީހުން ފާސްކޮށްފައި ވަނީ 54 މެންބަރުންގެ ވޯޓާއެކު އެވެ. ބިލާ ދެކޮޅަށް ވޯޓު ދެއްވީ 11 މެންބަރުންނެވެ.

އަތޮޅު ކައުންސިލްތައް އުވައިލުމަށް ގާނޫނުއަސާސީއަށް ހުށަހެޅި އިސްލާހުތައް ވެސް މި ހަފްތާ މަޖިލީހުން ވަނީ ފާސްކޮށްފަ އެވެ.