ރިސޯޓްތަކުގެ ޑޮލަރު ޖީއެސްޓީ 20.4 ޕަސެންޓް އިތުރު ވެއްޖެ

ރާއްޖޭގެ ރިސޯޓްތަކުން މި އަހަރުގެ ތިންވަނަ ކުއާޓަރުގައި ޑޮލަރުން ޖީއެސްޓީ ދެއްކި އަދަދު % 20.4 އިތުރު ވެއްޖެ އެވެ. 

މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ހިސާބުތައް ދައްކާ ގޮތުން މިދިޔަ އަހަރުގެ ތިންވަނަ ކުއާޓަރުގައި ރިސޯޓްތަކުން ޖީއެސްޓީގެ ގޮތުގައި ދައްކާފައިވަނީ  95 މިލިއަން ޑޮލަރު އެވެ. ނަމަވެސް މި އަހަރުގެ ތިންވަނަ ކުއާޓަރުގައި ޖީއެސްޓީ ދެއްކި އަދަދު ވަނީ 114 މިލިއަން ޑޮލަރަށް އިތުރުވެފަ އެވެ. 

ރިސޯޓްތަކުން ޖީއެސްޓީ ދެއްކި އަދަދު އިތުރުވިނަމަވެސް ތިންވަނަ ކުއާޓަރުގައި ގެސްޓްހައުސްތަކުން ޑޮލަރުން ޖީއެސްޓީ ދެއްކި މިންވަރު ވަނީ ދަށްވެފަ އެވެ. މިދިޔަ އަހަރު ގެސްޓްހައުސްތަކުން ޖީއެސްޓީގެ ގޮތުގައި  2,2 މިލިއަން ޑޮލަރު ދެއްކި އެވެ. ނަމަވެސް މި އަހަރުގެ ތިންވަނަ ކުއާޓަރުގައި މި އަދަދު ވަނީ 1,7 މިލިއަން ޑޮލަރު ދަށްވެފަ އެވެ. 

ޓޫރިޒަމް ހިސާބުތައް ދައްކާ ގޮތުން ތިންވަނަ ކުއާޓަރުގައި ޑައިވް ސެންޓަރުތަކުން ޑޮލަރުން ޖީއެސްޓީ ދެއްކި މިންވަރުވެސް ވަނީ އިތުރުވެފަ އެވެ. މިދިޔަ އަހަރު ޖީއެސްޓީގެ ގޮތުގައި ޑައިވް ސެންޓަރުތަކުން ވަނީ ދެ މިލިއަން ޑޮލަރު އެވެ. ނަމަވެސް މި އަހަރު މި އަދަދު ވަނީ 2.2 މިލިއަން ޑޮލަރަށް އިތުރުވެ 13 ޕަސެންޓުގެ އިތުރުވުމެއް ލިބިފަ އެވެ.