މިސްކިތްތަކަށް ގެއްލުން ދިނުމަކީ ޓެރަރިޒަމްގެ ކުށަކަށް ހަދަން ބިލެއް

މިސްކިތްތަކަށް ގެއްލުން ދިނުމަކީ ޓެރަރިޒަމްގެ ކުށެއް ކަމަށް ކަނޑައެޅުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހަޅައިފި އެވެ.

ޓެރަރިޒަމް މަނާ ކުރުމުގެ ގާނޫނަށް އިސްލާހު ހުށަހެޅުމަށް ބިލު ހުށަހަޅުއްވި ސަބަބެއްގެ ގޮތުގައި ބަޔާންކޮށްފައި ވަނީ، ގާނޫނުއަސާސީގެ 10 ވަނަ މާއްދާގައި، ދިވެހި ދައުލަތުގެ ދީނަކީ އިސްލާމްދީން ކަމަށް ބަޔާންކޮށްފައިވާއިރު، 100 ޕަސެންޓް މުސްލުން ދިރިއުޅޭ މި ގައުމުގައި، މިސްކިތްތަކަށް ގެއްލުން ދިނުމަކީ އާންމު ކަމަކަށްވާތީ ކަމަށެވެ.

އަދި، އެފަދަ އަމަލުތައް ތަކުރާރުވަމުންދާތީ، އެފަދަ އަމަލުތަކަކީ މިސްކިތްތަކުގެ ކަރާމާތަށް އުނިކަން ލިވޭފަދަ އަމަލުތަކަކަށްވާތީ، މިސްކިތުގެ ކަރާމާތް ހިފެހެއްޓުމަކީ އިސްލާމް ދީނަށް ހުރުމަތްތެރިކޮށް ހިތުމުގެ ތެރެއިންވާ ކަމެއް ކަމަށް ވެސް ބަޔާންކޮށްފައިވެ އެވެ.

"އެފަދަ އަމަލުތައް ޓެރަރިޒަމްގެ އަމަލުތަކުގެ ތެރޭގައި ހިމެނުމަކީ މުހިންމު ކަމެއް ކަމަށްވާތީ ހުށަހަޅާ އިސްލާހެއް،" ކުޑޫ ހުށަހެޅުއްވި ބިލުގައިވެ އެވެ.

އެ ބިލުގައި ވަނީ ޓެރަރިޒަމް މަނާކުރުމުގެ ގާނޫނުގެ 4 ވަނަ މާއްދާގެ ށ. ގެ 7 ވަނަ ނަމްބަރުގެ ފަހަތަށް ނަމްބަރެއް އިތުރުކޮށް، "މިސްކިތަށް ގެއްލުން ދިނުން" ހިމެނުމަށެވެ. 

މިސްކިތްތަކަށް ގެއްލުން ދިނުން ފަހަކަށް އައިސް ވަނީ ވަރަށް ބޮޑަށް އާންމުވެފަ އެވެ. މިސްކިތްތަކުގައި ކައިބޮއި ހަދައި، ނިދުމަކީ ވެސް އާންމު ކަމެކެވެ.