ސްޓެލްކޯއިން 100 އަށްވުރެ ގިނަ އަންހެނުންނަށް އިލެކްޓްރީޝަން ކޯހެއް ހިންގައިފި

ސްޓެލްކޯއިން ހިންގި ބިގިނާސް އިލެކްޓްރީޝަން ކޯސް ފޯ ވިމެން ފުރިހަމަކުރި ބައިވެރިންނަށް ސެޓްފިކެޓް ދީފި އެވެ.

މިކަމަށްޓަކައި މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވީ ފަސްޓްލޭޑީ، މެޑަމް ސާޖިދާ މުހައްމަދެވެ.

ކޯހުގެ ބައިވެރިންނާ ސެޓްފިކެޓް ހަވާލުކޮށްދެއްވީ މެޑަމް ސާޖިދާ އާއި ސްޓެލްކޯގެ މެނޭޖިނގ ޑިރެކްޓަރު އަހުމަދު ޝަމާހް ޝަރީފާއި ސްޓެލްކޯގެ ޑެޕިއުޓީ މެނޭޖިން ޑިރެކްޓަރު އައިޝަތު މުޒްނާ އެވެ.

މި ކޯހަކީ އާންމުކޮށް ހުޅުވާލައިގެން 16 އަހަރުން މަތީގެ ކޮންމެ ކަނބަލަކަށް ބައިވެރިވެވޭނެހެން ކުރިއަށްގެންދިޔަ ކޯހެކެވެ.
ޖުމްލަ ހަތް ބެޗަކަށް ބަހާލައިގެން ކުރިއަށްގެންދިޔަ މި ކޯހުގައި ބައިވެރިވެ 116 ކަނބަލުން ވަނީ ކޯސް ފުރިހަމަކޮށްފަ އެވެ. މި ކޯހުގައި ޓްރެއިނަރުންގެ ގޮތުގައި ބައިވެރިވެވަޑައިގެންނެވީ ސްޓެލްކޯގައި ތިބި އެ ދާއިރާގެ ތަޖުރިބާކާރު ބޭފުޅުންނެވެ.

ސްޓެލްކޯ އިން ބުނީ މި ކޯހުގެ މަގުސަދަކީ ކަރަންޓުގެ ދާއިރާއަށް ކަނބަލުންގެ ހިތް ޖައްސުވައި، އެ ދާއިރާއިން ކުރިއަށްދިއުމަށް ހިތްވަރުދީ، އެ ދާއިރާއިން ފިރިހެނުންނާއި އެއްހަމައެއްގައި މަސައްކަތް ކުރުމުގެ ފުރުސަތު ފަހިކޮށްދިނުމަށްޓަކައި ދާއިރާއަށް އަހުލުވެރިކޮށް، އެމަގަށް ހަރުދަނާ ބިންގަލެއް އަޅައިދިނުން ކަމަށެވެ.

މި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން މެޑަމް ސާޖިދާ ވިދާޅުވީ ފަށާ ފެންވަރުގެ މައުލޫމާތާއި މަސައްކަތާއި ހުނަރަށް ހާއްސަކޮށްގެން މި ކޯސް ފަރުމާކުރެވިފައި އޮތުމަކީ ބޮޑު ބަދަލަކަށް އުއްމީދު ކުރެވޭ، ތަސައްވަރު ކުރެވޭ ކަމެއް ކަމަށެވެ.

"މި ކޯސް ހާއްސަކުރެވިފައި މިވަނީ އަންހެނުންނަށް. ކޯހުގެ މައިގަނޑު މަގުސަދެއް ކަމަށް ކަނޑައެޅިފައިމިވަނީ، ގޭތެރޭގައި ޙައްލުކުރަންޖެހޭ ކަރަންޓުގެ މައްސަލަތައް ގޭތެރޭން ޙައްލުކުރެވޭނެ މަގު ފަހިކުރުން،" މެޑަމް ސާޖިދާ ވިދާޅުވި އެވެ.