ދަރުމެންދްރަ މަރުވެފައިވާކަން "ފިލްމްފެއާ" އަދި ބައެއް އެހެން ނޫސްތަކުން ވަނީ ކަށަވަރުކޮށްދީފަ އެވެ. އުމުރުން 89 އަހަރުގައި އޭނާ މިއަދު މަރުވީ އަމިއްލަ ގޭގައި އޮއްވަ އެވެ.

ދަރުމެންދްރަ މަރުވެފައިވާކަން "ފިލްމްފެއާ" އަދި ބައެއް އެހެން ނޫސްތަކުން ވަނީ ކަށަވަރުކޮށްދީފަ އެވެ. އުމުރުން 89 އަހަރުގައި އޭނާ މިއަދު މަރުވީ އަމިއްލަ ގޭގައި އޮއްވަ އެވެ.
މަޝްހޫރު "ޝޯލޭ" ފިލުމުގެ އައިކޮނިކް "ވީރޫ" ގެ ރޯލު ކުޅެފައިވާ ދަރްމެންދްރަ މުސްކުޅި ބަލީގައި ފަރުވާ ހޯދަމުންދާތާ މަހެއް ވެއްޖެ އެވެ. ހާލު ދެރަވެގެން މިމަހުގެ 10 ވަނަ ދުވަހު މުމްބާއީގެ ބްރީޗް ކޭންޑީ ހޮސްޕިޓަލުގައި އެޑްމިޓް ކޮށްގެން ފަރުވާ ވެސް ދިނެވެ.
އޭރު އޭނާ މަރުވެއްޖެ ކަމުގެ ދޮގު ހަބަރުތަކެއް ފެތުރިފައި ވަނިކޮށް، އޭނާ ހޮސްޕިޓަލުން ވަނީ ދޫކޮށްލާފަ އެވެ.
ދަރްމެންދްރަ އެންމެ ފަހުން ފެނުނީ މިދިޔަ އަހަރު ނެރުނު "ތެރި ބާތޯ މޭ އުލްޖާ ޖިއާ" ފިލުމުގައި، އެކްޓަރު ޝާހިދު ކަޕޫރުގެ ކާފަގެ ރޯލުންނެވެ. އަދި އެންމެ ފަހުން ކުޅެފައި ވަނީ އަންނަ އަހަރު ރިލީޒް ކުރާ "އިއްކިސް" ފިލްމުގައި ލީޑް އެކްޓަރުގެ ކާފަގެ ރޯލެވެ.
ދަރްމެންދްރަގެ ދެ އަނބިންނާއި ހަ ކުދިން ތިބެ އެވެ. އޭގެ ތެރެއިން މަޝްހޫރު ސަނީ ޑިއޯލް އާއި ބޮބީ ޑިއޯލް އަކީ އޭނާގެ ފުރަތަމަ އަނބި، ޕްރަކޭޝް ކޯރުގެ ކުދިންނެވެ. ދެވަނަ އަންބަކީ ހޭމާ މާލީނީ އެވެ.
1960 ވަނަ އަހަރު ބޮލީވުޑަށް ނުކުތް ދަރްމެންދްރަ ވަނީ 300 އަށްވުރެ ގިނަ ފިލްމު ކުޅެފަ އެވެ.