މިލަންދޫ ފަރަށް އެރި ޓަގު ބޯޓަށް 12 މިލިއަންގެ ޖޫރިމަނާއެއް
އެ ފަރުގެ 477 އަކަމީޓަރުގެ ސަރަހައްދަކަށް ބޮޑެތި ގެއްލުންތަކެއް ލިބި، ހަލާކުވެފައިވާކަން ވަނީ ފާހަގަކުރެވިފަ
ށ. މިލަންދޫ ފަރަށް މިދިޔަ އަހަރު އުރުނު ޓަގު ބޯޓު، 12 މިލިއަނަށް ވުރެ ގިނަ ރުފިޔާއިން ޖޫރިމަނާކޮށްފި އެވެ.
އެޓޯލް ނެވިގޭޝަން ސާވިސަސް ޕްރައިވެޓް ލިމިޓެޑްގެ އޭޖެންޓް ކަމުގެ ދަށުން ރާއްޖެ އައިސްފައިވާ ރިޕަބްލިކް އޮފް ނިޔޫގައި ރަޖިސްޓްރީކޮށްފައިވާ "ޝްވޭ ލިން ޔޯން" ނަމަކަށް ކިޔާ ޓަގު، މިލަންދޫގެ ފަރަށް އުރުނީ 03 އޮކްޓޫބަރު 2024 ގަ އެވެ.
އެންވަޔަރަމަންޓް ރެގިއުލޭޓަރީ އޮތޯރިޓީ (އީއާރުއޭ) އިން ބުނީ މި އުޅަނދު 19 އޮކްޓޫބަރު 2024 ގައި ފުންކޮށް، ފަރުމަތިން ނަގާފައިވާތީ، ފަރަށް ލިބުނު ގެއްލުންތައް ބެލުމުގެ ގޮތުން 07 އަދި 08 ނޮވެންބަރު 2024 ގައި އެ އުޅަނދުގެ ވެރިފަރާތުން އައްޔަންކުރި ސާވެޔަރުންނާއެކު އެ އުޅަނދު ފަރަށް އެރި ސަރަހައްދުގައި ޖޮއިންޓް ސާވޭއެއް ކުރެވިފައިވާ ކަމަށެވެ.
"މި އުޅަނދު ފަރަށް އެރި ސަރަހައްދު ބެލި ބެލުމުން އެ ފަރުގެ 477 އަކަމީޓަރުގެ ސަރަހައްދަކަށް ބޮޑެތި ގެއްލުންތަކެއް ލިބި، ހަލާކުވެފައިވާކަން ވަނީ ފާހަގަކުރެވިފަ އެވެ،" އީއާރުއޭއިން ބުންޏެވެ.
އެހެންކަމުން، އެ ފަރުގެ މާހައުލަށް ލިބުނު ގެއްލުންތަކަށް 12,006,200.00ރ ޖޫރިމަނާއެއް ވަނީ ކަނޑައަޅައިފަ އެވެ.
އެއާ އެކު، އުޅަނދުގެ ވެރިފަރާތް ކަމުގައިވާ ސިންގަޕޫރުގެ ކުންފުންޏެއް ކަމަށްވާ ގްލޯހާ މެރިޓައިމް ޕްރައިވެޓް ލިމިޓެޑަށް ވަނީ މި ޖޫރިމަނާ 30 ދުވަހުގެ ތެރޭގައި ދައްކަން އަންގައިފަ އެވެ.
ކޮމެންޓް
Republic of Maldives