ވާރުތަވީ ލޯނުތައް ދައްކަން 4.4 ބިލިއަން ރުފިޔާ ހޭދަކޮށްފި

މި އަހަރުގެ މިހާތަނަށް ދައުލަތަށް ވާރުތަވީ ލޯނުތައް ދައްކަން ސަރުކާރުން 4.4 ބިލިއަން ރުފިޔާ ހޭދަކޮށްފި އެވެ. 

ފިނޭންސް މިނިސްޓްރީން އާއްމުކުރި ވީކްލީ ފިސްކަލް ރިޕޯޓް ދައްކާ ގޮތުން މިދިޔަ އަހަރުގެ މި މުއްދަތާ ހަމައަށް ބަލާނަމަ ލޯނު ދައްކަން ކުރި ހަރަދު އުޅެނީ ދެ ބިލިއަން ރުފިޔާގަ އެވެ. ނަމަވެސް މި އަހަރުގެ މިހާތަނަށް ކުރި ހަރަދު ވަނީ 4.4 ބިލިއަން ރުފިޔާއަށްވުރެ އިތުރުވެފަ އެވެ. 

މާލީ ރިޕޯޓް ދައްކާ ގޮތުން މި އަހަރު ލޯނު ދައްކަން ބަޖެޓުކޮށްފައިވަނީ 3.8 ބިލިއަން ރުފިޔާ އެވެ. 

ފިނޭންސުގެ މައުލޫމާތުތައް ދައްކާ ގޮތުން ރާއްޖޭގެ ޖުމްލަ ދަރަނި މިހާރު ވަނީ 151 ބިލިއަން ރުފިޔާ އަރާފަ އެވެ. އަދި ގައުމީ އުފެއްދުންތެރިކަމުގެ ނިސްބަތުން ދަރަނި 129.9 ޕަސެންޓަށް ވަނީ އަރާފަ އެވެ. ފިނޭންސް މިނިސްޓްރީގެ މިއަހަރުގެ ތިންވަނަ ކުއާޓަރުގެ ނިޔަލަށް އާއްމުކުރި ދަރަނީގެ މައުލޫމާތުތައް ދައްކާ ގޮތުން ރާއްޖޭގެ ބޭރުގެ ދަަރަނީގެ ނިސްބަތް މިހާރު ހުރީ 63 ބިލިއަން ރުފިޔާގަ އެވެ. އަދި އެތެރޭގެ ދަރަނި ހުރީ 88 ބިލިއަން ރުފިޔާގަ އެވެ. އަދި ޖުމްލަ ދަރަނި ހުރީ 151 ބިލިއަން ރުފިޔާގަ އެވެ. ފިނޭންސުގެ މި މައުލޫމާތުތަކުން އެނގޭ ގޮތުގައި ރާއްޖޭގެ ސޮވްރިން ގެރެންޓީ ދީފައިވާ ދަރަނި ހުރީ 20,8 ބިލިއަން ރުފިޔާގަ އެވެ. އަދި ސޮވްރިން ގެރެންޓީ ދީފައިވާ ބޭރުގެ ދަރަނީގެ ނަމްބަރު ހުރީ 20 ބިލިއަން ރުފިޔާގަ އެވެ. އަދި އެތެރޭގެ ދަރަނި ހުރީ 638.4 ބިލިއަން ރުފިޔާގަ އެވެ.