މެކްސިކޯ މޭޔަރު އަވަހާރަކޮށްލުމާ ގުޅިގެން ހަތް ބޮޑީގާޑުން ހައްޔަރުކޮށްފި

މެކްސިކޯގެ ޔޫރޫއާޕާންގެ މޭޔަރު ކާލޯސް މާންޒޯ އަވަހާރަކޮށްލުމުގެ ތުހުމަތުގައި، އޭނާގެ ސަލާމަތީ ކަންތައް ބަލަހައްޓަން ތިބި ހަތް ބޮޑީގާޑުން ހައްޔަރުކޮށްފި އެވެ. 

މެކްސިކޯ ޕްރޮސެކިއުޓާ އޮފީހުން ބުނެފައިވާ ގޮތުގައި މޭޔަރު އަވަހާރަކޮށްލުމާ ގުޅިގެން ކުރިއަށް ގެންދާ ތަހުގީގަށް ހައްޔަރުކޮށްފައިވަނީ އެ ވަގުތު އޭނާގެ ސަލާމަތީ ކަންކަން ބަލަހައްޓަން ތިބި ހަތް ސެކިއުރިޓީ އޮފިސަރުންނެވެ. މިއީ ހަތް ފުލުހުންނެވެ. މޭޔަރަށް ހަމަލާދީ އަވަހާރަކޮށްލާފައިވަނީ 17 އަހަރުގެ ކުއްޖެކެވެ. އެ ކުއްޖާ މޭޔަރުގެ ގާޑުން ވަނީ މަރާލާފަ އެވެ.

ނަމަވެސް މިހާރު ތުހުމަތު ކުރެވިފައިވާ ގޮތުގައި ގޭންގްތަކާ ދެކޮޅަށް މަސައްކަތްތަކެއް ކުރައްވަމުން ގެންދިޔަ މޭޔަރު އަވަހާރަކޮށްލުމުގެ އަޑީގައި ވަނީ ޔާލިސްކޯ ނިއު ޖެނެރޭޝަން ކާޓެލް ކިޔާ ގޭންގް އެކެވެ. މެކްސިކޯ ފުލުހުން ވަނީ މި ހަމަލާގެ މާސްޓަ މައިންޑުގެ ގޮތުގައި ތިބި ކަމަށް ބެލެވޭ ހޯހޭ އާމާންޑޯ "އެން" ނުވަތަ "އެލް ލިސެންސިއާޑޯ" ހައްޔަރުކޮށްފަ އެވެ. 

މޭޔަރުގެ މަރާ ގުޅިގެން މެކްސިކޯ ސިޓީގައި ބޮޑެތި މުޒާހަރާތަކެއް ދަނީ ކުރަމުންނެވެ. މި މުޒާހަރާތަކުގައި ގިނައީ ޒުވާނުންނެވެ. މުޒާހަރާގެ ތެރެއިން 100 އަށް ވުރެ ގިނަ މީހުން ޒަހަމްވެ 19 މީހުން ހައްޔަރުކޮށްފައިވެ އެވެ.