ޓީބިލް ނުދައްކާ އަދަދު ދަށަށް، އެތެރޭގެ ދަރަނީގެ ބޮޑުބައި ކުރު މުއްދަތަށް

ދައުލަތުގެ ހަރަދު ހަމަޖައްސަން ނެގި މާލީ ވަސީލަތްތަކާއެކު ތެރޭގެ ދަރަނީގެ ޖުމްލަ 87 ބިލިއަން ރުފިޔާގައި ހުރިއިރު މި ދަރަނީގެ ބޮޑުބައެއް ކުރު މުއްދަތެއްގެ ތެރޭގައި ދައްކަން ޖެހޭ ކަމަށް ދައްކައިފި އެވެ.

ފިނޭންސް މިނިސްޓްރީގެ ދަރަނީގެ ހިސާބުތައް ދައްކާ ގޮތުގައި މި އަހަރުގެ ތިންވަނަ ކުއާޓަރު ނިމުނުއިރު އެތެރޭގެ ދަރަނި ވަނީ 87.3 ބިލިއަން ރުފިޔާއަށް އުފުލިފަ އެވެ. މި އަހަރުގެ ދެވަނަ ކުއާޓަރު ނިމުނުއިރު އެތެރޭގެ ދަރަނި ހުރީ 85.3 ބިލިއަން ރުފިޔާގަ އެވެ. އެހެންކަމުން، މިދިޔަ ތިން މަހު ވަނީ ދެ ބިލިއަނެއްހާ ރުފިޔާ އެތެރޭގެ ދަރަންޏަށް އިތުރުވެފަ އެވެ. އަދި ކުރު މުއްދަތުގެ ދަރަނީގެ ގޮތުގައި ހުރި 37,2 ބިލިއަން ރުފިޔާ އެވެ. އަދި ދިގު މުއްދަތުން ދައްކަން ޖެހޭ ދަަރަނި އުޅެނީ 39 ބިލިއަން ރުފިޔާގަ ގަ އެވެ.

އެތެރޭގެ ދަރަންޏަށް ބަލާއިރު، ދައުލަތުގެ އެތެރޭގެ ދަރަނީގެ ނިސްބަތުން ބޮޑުބައި (55.3%) ހިއްސާކުރަނީ ކުރު މުއްދަތުގެ ދަރަންޏެވެ. މީގެ މާނައަކީ މި ދަރަނިތައް އަނބުރާ ދައްކަންޖެހޭ މުއްދަތު ވަރަށް ކުރުވުމެވެ. ކުރު މުއްދަތުގެ ދަރަނީގެ ތެރޭން އެންމެ ބޮޑަށް އިތުރުވެފައިވަނީ އިސްލާމިކް އިންސްޓްރޫމަންޓެއް ކަމަށްވާ "ވަކާލާ ބިލް އިސްތިސްމާ"  އެވެ. މި މާލީ ވަސީލަތް 3,8 ބިލިއަން ރުފިޔާއިން 4.7 ބިލިއަން ރުފިޔާއަށް ވަނީ އިތުރުވެފަ އެވެ. 

އެތެރޭގެ ދަރަނި އިތުރުވިނަމަވެސް ކުރިން ނުފެންނަ ޕޮޒިޓިވް ސިންގްނަލްތަކެއް ވެސް ދަރަނީގެ ކަރުދާހުން ފެނެ އެވެ. މި ވަރަށް އެތެރޭގެ ދަރަނި އިތުރުވިނަމަވެސް ކޮންމެ ހަފުތާއަކު ސަރުކާރުގެ ހަރަދު ހަމަޖައްސަން ތެެރޭގައި ވިއްކާ ޓީބިލްގެ ނުދައްކާ ހުރި އަދަދު ވަނީ ދަށްވެފަ އެވެ.

ތަފާސް ހިސާބުތައް ދައްކާ ގޮތުން މި އަހަރުގެ ދެވަނަ ކުއާޓަރުގެ ނިޔަލަށް ޓީބިލްގެ ނުދައްކާ ހުރި އަދަދު ހުރީ 49 ބިލިއަން ރުފިޔާގަ އެވެ. ނަމަވެސް ތިންވަނަ ކުއާޓަރާ ހަމައަށް ބަލާނަމަ މި އަދަދު ވަނީ 48 ބިލިއަން ރުފިޔާށް ދަށްވެފަ އެވެ. ސަރުކާރުން ޓީބިލް ވިއްކަނީ 3% އާއި 5% އާދެމެދުގެ ފައިދާއެއްގަ އެވެ.

ސަރުކާރުން ވިއްކާ ޓީބިލް ގަންނަނީ ވިޔަފާރި ބޭންކްތަކާއި މޯލްޑިވްސް މަނިޓަރީ އޮތޯރިޓީ އަދި ޕެންޝަން ފަންޑާއި ދައުލަތުގެ ކުންފުނިތައް އަދި އާންމު ފަރުދުންނާއި ކުންފުނިތަކުންނެވެ. 

މި މައުލޫމާތުތައް ދައްކާ ގޮތުން ކުރު މުއްދަތުގެ އެތެރޭގެ ދަރަނީގެ ޖުމްލަ ނަމްބަރުގެ ގޮތުގައި 48,3 ބިލިއަން ރުފިޔާގެ ދަރަނި އެބަހުއްޓެވެ. 

ދިގު މުއްދަތުގެ ދަރަނީގެ ނުދައްކާ ހުރި އަދަދު އުޅެނީ 39 ބިލިއަން ރުފިޔާގަ އެވެ. މީގެތެރޭގައި ހިމެނެނީ ބޮންޑުގެ ގޮތުގައި ހުރި 38,5 ބިލިއަން ރުފިޔާ އާއި ލޯނުގެ ގޮތުގައި ހުރި 447.1 ބިލިއަން ރުފިޔާ އެވެ. ދިގު މުއްދަތުގެ ދަރަނީގެ ގާތްގަނޑަކަށް 99% ހިއްސާކުރަނީ ބޮންޑް އެވެ. ބޮންޑް ނެގި އަދަދު މިދިޔަ އަހަރުގެ ހަތަރުވަނަ ކުއާޓަރުގައި 34.4 ބިލިއަން ރުފިޔާގައި ހުރިނަމަވެސް މި އަހަރުގެ ތިންވަނަ ކުއާޓަރުގައި މި އަދަދު ވަނީ 38.5 ބިލިއަން ރުފިޔާއަށް އިތުރުވެފަ އެވެ.