ސެލޫންއެއްގައި ހަށިވިއްކާ ކަމުގެ ތުހުމަތުގައި ހަތަރު މީހަކު ހައްޔަރު ކޮށްފި

މާލޭގައި ހިންގަމުންދާ ސެލޫންއެއްގައި ހަށިވިއްކަމުންދާ ކަމުގެ ތުހުމަތުގައި ހަތަރު މީހަކު ހައްޔަރު ކޮށްފި އެވެ.

ފުލުހުން މިދިޔަ ހޯމަ ދުވަހު ހ. އަރިހިޔާ ގޭގެ ތިންވަނަ ފަންގިފިލާގައި ހިންގަމުންދާ “ޕީސް ސެލޫން އެންޑް ސްޕާ” ބަލައިފާސްކުރުމަށްފަހު ހައްޔަރު ކޮށްފައި ވަނީ ދިވެހި ފިރިހެނަކާއި ތައިލެންޑް ތިން އަންހެނުންނެވެ.

ފުލުހުން ބުނީ އެ އޮޕަރޭޝަން ހިންގާފައި ވަނީ ފައިސާގެ މުގާބިލުގައި ޖިންސީ ކުށުގެ އަމަލު ހިންގައި، ހަށިވިއްކުމުގެ ވިޔަފާރިކުރަމުންދާ ކަމަށް ތުހުމަތުކުރެވޭ މައްސަލައާ ގުޅިގެން ކަމަށެވެ.

މި މައްސަލައިގައި ހައްޔަރު ކޮށްފައިވާ ދިވެހި މީހާ އަކީ ގއ. ވިލިނގިލި، ރިވެލި، މުޖައްމަދު ސަމާމް ރަޝީދު 28، އެވެ. ދެން ހައްޔަރު ކޮށްފައި ވަނީ ތައިލެންޑް ތިން އަންހެނުން ކަމަށްވާ ޖުންޕެން ކުމްބޮންޕިޓަކް 38، އާއި ޕަޓްޗަރިދާ ބަންނަބޮޑީ 24، އާއި ސުޕަވަޑީ ޖޮމްޓަރަކު 21، އެވެ.

އެ ހަތަރު މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، ސަމާމް، ޖުންޕެން ކުމްބޮންޕިޓަކް އަދި ސުޕަވަޑީ ޖޮމްޓަރަކު ވަނީ ތިން ދުވަހަށް ބަންދު ކޮށްފަ އެވެ. އަދި ޕަޓްޗަރިދާ ބަންނަބޮޑީ ބަންދު ކޮށްފައި ވަނީ 30 ދުވަހަށެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.