އެމްއެމްއޭ ރިސާޗް ކޮންފަރެންސް މާދަމާ | މާހިރުންނާއެކު ގިނަ ޕެނަލް ޑިސްކަޝަންތަކެއް

ރާއްޖޭގެ މަރުކަޒީ ބޭންކް (އެމްއެމްއޭ) އިން މާދަމާ ފަށާ އެމްއެމްއޭ ރިސާޗް ކޮންފަރެންސްގައި މި އަހަރުވެސް ގިނަ ޕެނަލް ޑިސްކަޝަންތަކެއް އޮންނާނެ އެވެ. 

އެމްއެމްއޭ ރިސާޗް ކޮންފަރެންސްއަކީ ރާއްޖޭގެ އިޤްތިސާދާއި މާލީ ދާއިރާއާ ގުޅުންހުރި ދިރާސާތައް ހުށަހަޅާ، ސިޔާސަތުތައް ބައްޓަންކުރުމަށް މަގު ފަހިކުރުމުގެ މުހިންމު ޕްލެޓްފޯމެކެވެ.

"ދެމެހެއްޓެނިވި ރާއްޖެއަށް ސިޔާސަތުތައް ބައްޓަންކުރުން ؛ އީޖާދީ އުފެއްދުން، ހަމަޖެހުން، އަދި ހަމަހަމަ ކުރިއެރުން" މި ޝިއާރުގައި ބާއްވާ މި ކޮންފަރެންސުގައި މާލީ ދާއިރާއިން ރާއްޖެއާއި ރާއްޖޭން ބޭރުގެ އެކްސްޕާޓުން ބައިވެރިވާނެ އެވެ. ވިލާނޯޓިކާގައި ދެ ދުވަހުގެ މުއްދަތަށް ކުރިއަށްދާ މި ކޮންފަރެންސުގައި އޮންނަ ޕެނަލް ޑިސްކަޝަންގައި ބައިވެރިވާ އެކްސްޕާޓުންގެ ތެރޭގައި އެމްއެމްއޭގެ ކުރީގެ ގަވަރުނަރު ޑރ. އަޒީމާ އާދަމްގެ އިތުރުން އިސްލާމިކް ފައިނޭންސްގެ ތަޖުރިބާކާރެއް ކަމަށްވާ ޕްރޮފެސަރު ޑރ. އައިޝަތު މުނީޒާ ފަދަ އެތައް ތަޖުރިބާކާރުންނެއް ހިމެނެ އެވެ. 

އެމްއެމްއޭއިން ފުރަތަމަ ރިސާޗް ކޮންފަރެންސް ބޭއްވީ މިދިޔަ އަހަރު އެވެ. މިދިޔަ އަހަރުގެ ކޮންފަރެންސުގައި ރިސާޗް ފަންޑެއް ވަނީ ތައާރަފުކޮށްފަ އެވެ. މި ފަންޑުގެ މަގުސަދަކީ ރާއްޖޭގެ އިގްތިސާދީ މާލީ އަދި ތަރައްގީގެ މައްސަލަތައް ދެނެގަނެ، އެކަމަށް ހައްލު ހޯދުމަށް ބާރުއެޅުމެވެ. މިއީ އެއް މިލިއަން ރުފިޔާގެ އެހީތެރިކަން ދޭ ފަންޑެކެވެ. މި ފަންޑން ތިން ބާވަތެއްގެ އެހީތެރިކަން ދެ އެވެ. މިގޮތުން އެމްއެމްއޭގެ މުވައްޒަފުންގެ ބައިވެރިވުން ނުހިމެނޭ ގޮތަށް ދޭ އިންޑިޕެންޑެންޓް ރިސާޗް ގްރާންޓާއި އެމްއެމްއޭ ރިޗާސް ޓީމާއެކު ކުރިއަށް ގެންދާ ކޮލެބޮރޭޓިވް ރިސާޗް ގްރާންޓް އަދި މާލީ ކަންކަމަށް ހޭލުންތެރި ކުރުވަން ފޮތް ލިޔާ ފަރާތްތަކަށް ދޭ އެހީވެސް ހިމެނެ އެވެ.