މަރުކަޒީ ބޭންކުގެ ފިޔަވަޅުތަކާއެކު ބޭންކްތަކުގައި ފައިސާ އިތުރުވާން ފަށައިފި

މަރުކަޒީ ބޭންކް (އެމްއެމްއޭ) އިން މިހާރު އަޅަމުންދާ ފިޔަވަޅުތަކުގެ ސަބަބުން ރާއްޖޭގެ ވިޔަފާރި ބޭންކްތަކުގެ ލިކުއިޑިޓީ، ނުވަތަ ނަގުދު ފައިސާގެ ގާބިލްކަން އިތުރުވަމުންދާ ކަމަށް ދައްކައިފި އެވެ. 

އެމްއެމްއޭގެ މިދިޔަ އޮކްޓޫބަރު މަހުގެ ސްޓޭޓްމަންޓް އޮފް ފައިނޭންޝަލް ޕޮޒިޝަން (އެސްއޯޕީ) ދައްކާ ގޮތުން ކޮމާޝަލް ބޭންކުތަކުގެ ބެލެންސުގެ ގޮތުގައި މިދިޔަ ސެޕްޓެމްބަރު މަހުގެ ނިޔަލަށް ހުރީ 8.5 ބިލިއަން ރުފިޔާ އެވެ. ނަމަވެސް މިދިޔަ މަހުގެ ނިޔަލަށް މި އަދަދު ވަނީ 8.9 ބިލިއަން ރުފިޔާއަށް އިތުރުވެފަ އެވެ. މި މުއްދަތު ތެރޭގައި ބޭންކްތަކުގެ ބެލެންސަށް ވަނީ 492 މިލިއަން ރުފިޔާއަށް އިތުރުވެފަ އެވެ. 

މި ބަދަލު އައި މައިގަނޑު ސަބަބަކީ ސެކިއުރިޓީޒް ސޯލްޑް އަންޑަ އެގްރީމެންޓް ޓު ރިޕާޗޭސް (ރިޕޯ) ގެ ސަބަބުންނެވެ. މިއ މަރުކަޒީ ބޭންކުން ފައިސާގެ ސިޔާސަތު ތަންފީޒުކުރުމަށްޓަކައި ބޭނުންކުރާ ވަރަށް މުހިންމު އެއް ވަސީލަތެވެ. މިކަމުގެ ސަބަބުން 
މުހިންމު ނިންމުމެއްގެ ގޮތުގައި 500 މިލިއަން ރުފިޔާގ ޓްރާންޒެކްޝަންތައް މަރުކުރެވިފައިވެ އެވެ. މި "ސެކިއުރިޓީޒް ސޯލްޑް އަންޑަރ އެގްރީމެންޓް ޓު ރިޕަރޗޭސް" ގެ މަގުސަދަކީ އިތުރުވެފައިވާ ލިކުއިޑިޓީ ނެގުމެވެ. މި ކަމުގެ ސަބަބުން އިތުރު 500 މިލިއަން ރުފިޔާ ބޭންކިން ނިޒާމަށް ދޫކުރަން ވަނީ ފުރުސަތު ފަހިވެފަ އެވެ. 

މިދިޔަ މަހުގެ ސްޓޭޓްމަންޓް އޮފް ފައިނޭންޝަލް ޕޮޒިޝަން ދައްކާ ގޮތުން އެމްއެމްއޭގެ ޖުމްލަ އެސެޓް ވެސް ވަނީ އިތުރުވެފަ އެވެ. މިދިޔަ ސެޕްޓެމްބަރު މަހުގެ ނިޔަލަށް ޖުމްލަ އެސެޓަށް 78 މިލިއަން ރުފިޔާ އިތުރުވެފައިވެ އެވެ. މިއާއެކު ބޭންކުގެ އިކުއިޓީ 15.04 މިލިއަން ރުފިޔާ އިތުރުވެފައިވާއިރު، މީގެ މައިގަނޑު ސަބަބަކީ ރިޒާވަށް އިތުރު ފައިސާ ޖަމާކުރެވިފައިވާތީ އެވެ.