އައިވީއެފް ހަދަން މިހާތަނަށް 7.13 މިލިއަން ރުފިޔާ ހަރަދުކޮށްފި

ފާޓިލިޓީ ކެއާ ޓްރަސްޓް ފަންޑުން މިއަހަރުގެ އޮކްޓޯބަރު މަހުގެ ނިޔަލަށް އައިވީއެފް ފަރުވާއަށް 7.13 މިލިއަން ރުފިޔާ ހަރަދުކޮށްފައިވާ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބުނެފި އެވެ.

އެންސްޕާ އިން އާންމުކުރި ތަފާސްހިސާބުތަކުން ދައްކާ ގޮތުގައި، ފާޓިލިޓީ ކެއާ ޓްރަސްޓް ފަންޑުން މިދިޔަ އަހަރު 4.78 މިލިއަން ރުފިޔާ ހަރަދުކޮށްފައިވެ އެވެ.

އަދި މިއަހަރުގެ އޮކްޓޯބަރު މަހުގެ ނިޔަލަށް 7.13 މިލިއަން ރުފިޔާ ހަރަދުކޮށްފައިވެ އެވެ. އެއީ 93 ފަރާތަކަށް އެހީގެ ގޮތުގައި ދޫކޮށްފައިވާ ފައިސާ ކަމަށް ތަފާސްހިސާބުތައް ދައްކަ އެވެ. އޭގެ ތެރެއިން އައިވީއެފް ކާމިޔާބުވެފައި ވަނީ 23 ފަރާތެކެވެ.

ދަރިމައިވުމުގައި ދަތިތައް ހުންނަ ފަރާތްތަކަށް ދައުލަތުގެ އެހީގައި އައިވީއެފް ފަރުވާ ހޯދައިދުމަކީ ރައީސް ޑރ. މުހައްމަދު މުއިއްޒުގެ ވެރިކަމުގެ ފުރަތަމަ 100 ދުވަހުގެ ވައުފުޅެކެވެ. އެ ވައުދާ އެއްގޮތަށް، އެހީއަށް އެދި ހުޅުވާލާފައި ވަނީ މިދިޔަ އަހަރުގެ މާޗު މަހު އެވެ.