އަނިޔާ ކުރާ ކަމުގެ ރިޕޯޓަކާ ގުޅިގެން ފުލުހުން ދިޔައިރު 17 ކިލޯގެ ޑްރަގު
"އެޕާޓްމަންޓް ބަލާފާސްކުރި އިރު، ވަގުތީ ބަރުދަނުގައި 17.39 ކިލޯ ހުރި މަސްތުވާތަކެތި ކަމަށް ބެލެވޭ ތަކެތި ފުލުހުންނަށް ވަނީ ފެނިފައި،" ފުލުހުން ބުންޏެވެ.
އެމްޕީއެލް ޓަވަރެއްގެ އެޕާޓްމަންޓަކުން ފިރިހެނަކަށް އަނިޔާ ކުރާ ކަމަށް ރިޕޯޓު ކުރުމުން، ފުލުހުން ގޮސް އެ އެޕާޓްމެންޓް ބެލިއިރު 17 ކިލޯގެ މަސްތުވާތަކެތި ފެނެއްޖެ އެވެ.
ފުލުހުން ބުނީ މި ތަކެތި ފެނިފައިވަނީ މިދިޔަ އާދީއްތަ ދުވަހުގެ ރޭ ދަންވަރު 01:31 ހާއިރު، ފިރިހެނަކަށް އަނިޔާކުރާ އަޑު އިވޭކަމަށް ބުނާ ރިޕޯޓަކަށް ހުޅުމާލެ ދެވަނަ ފިޔަވަހީގެ ފުލުހުން ރެސްޕޮންޑްކުރުމަށްފަހު، މަސްތުވާތަކެތި ހުރިކަމަށް ތުހުމަތު ކުރެވިގެން އެ އެޕާޓްމަންޓް ބަލައި ފާސްކުރިއިރު ކަމަށެވެ.
"އެޕާޓްމަންޓް ބަލާފާސްކުރި އިރު، ވަގުތީ ބަރުދަނުގައި 17.39 ކިލޯ ހުރި މަސްތުވާތަކެތި ކަމަށް ބެލެވޭ ތަކެތި ފުލުހުންނަށް ވަނީ ފެނިފައި،" ފުލުހުން ބުންޏެވެ.
މި މައްސަލައާ ގުޅިގެން، އެވަގުތު އެޕާޓްމަންޓުގައި ހުރި، ދަފްތަރު. ނަންބަރު ދރ 1786 / މާލެ، މުހައްމަދު ޖަޒުލާން އަޝްރަފު 29، ވަނީ ހައްޔަރުކޮށްފަ އެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން ވަނީ އަމުރުކޮށްފަ އެވެ.
އެ އެޕާޓްމެންޓްގައި ފުލުހުން ދިޔައިރު ޖަޒުލާނު ނޫނީ އިތުރު މީހަކު ނެތެވެ. އެޕާޓްމެންޓްތެރޭގައި ތަކެއްޗަށް ގެއްލުންދީ، ހަމަނުޖެހުމެއް ހިންގާފައިވާ ކަން ފާހަގަކުރެވިފައިވާ ކަމަށް ފުލުހުން ބުންޏެވެ.
މި މައްސަލަ ތަހުގީގު ކުރަމުން ދަނީ ޑްރަގް އެންފޯސްމަންޓާއި ހުޅުމާލެ ޕޮލިސް ގުޅިގެންނެވެ.
ކޮމެންޓް
Republic of Maldives