ފުލުހުންގެ ރެކޯޑު ސިސްޓަމާ ކުޅެފައިވާ ކަމަށް ތުހުމަތުކޮށް، މައްސަލަ ބަލަން ޝިފާން އެދިއްޖެ

ފުލުހުންގެ ރެކޯޑުތައް ހުންނަ ސިސްޓަމާ ކުޅެ، އޭނާއާ ގުޅޭ ދޮގު މައުލޫމާތު އެ ސިސްޓަމް ތެރެއަށް ވައްދާފައިވާ ކަމަށް ތުހުމަތުކޮށް، އެ މައްސަލަ ބަލައިދިނުމަށް އެސިސްޓެންޓް ކޮމިޝަނާ އޮފް ޕޮލިސް އަހްމަދު ޝިފާން އެދިއްޖެ އެވެ.

ޝިފާން އާއި ޑެޕިއުޓީ ކޮމިޝަނަރު ފަރުހާދު ފިކުރީއާ ބެހޭ މައްސަލަތަކެއް ފާހަގަކޮށް، ފުލުހުންގެ ހިދުމަތުގެ މަތީ ރޭންކްތަކުގެ 11 އޮފިސަރުން ވަނީ ވިސުލްބްލޯވަރުންގެ ގޮތުގައި ރައްޔިތުންގެ މަޖިލީހުގެ 241 ކޮމެޓީއަށް ސިޓީއެއް ފޮނުވާފަ އެވެ.

އެ ސިޓީގައި، ޝިފާނަށް ކޮށްފައި ވަނީ ބަދުއަހުލާގީ އަމަލު ހިންގުމުގެ ތުހުމަތުތަކަކާއި، ބައެއް ފުލުހުން ފްރޭމް ކުރަން އުޅުމުގެ ތުހުމަތުތަކެކެވެ. އެގޮތުން، ޝިފާންގެ ދަށުން މަސައްކަތްކުރާ އަންހެން މުވައްޒަފުނަށާއި ފިރިހެން މުވައްޒަފުންގެ އަނބިންނާ އެކުގައި ބަދުއަހުލާގީ އަމަލު ހިންގައިފައިވާ ކަމަށް އެ ސިޓީގައި ތުހުމަތުކޮށްފައިވެ އެވެ. އަދި، އެހެނިހެން އޮފީސްތަކުގައި މަސައްކަތް ކުރާ އަންހެން މުވައްޒަފުންނާ ގުޅުންހުރި އެފަދަ މައްސަލަތަކެއް އެ ސިޓީގައި ފާހަގަކޮށްފައިވެ އެވެ.

އެ ތުހުމަތުތަކާ ގުޅިގެން ޝިފާން ވަނީ ޗީފް އޮފް ޕޮލިސް އިސްމާއީލް ނަވީންއަށް ސިޓީއެއް ފޮނުއްވައިފަ އެވެ. އެ ސިޓީގައި އޭނާ ފާހަގަކުރައްވާފައި ވަނީ، ފުލުހުންގެ ޕްރޮފެޝަނަލް ސްޓެންޑާޑް ކޮމިޝަން (ޕީއެސްސީ) ގައި އޭނާއާ ގުޅޭ ގޮތުން ރެކޯޑުކޮށްފައިވާ ޒާތީ މައުލޫމާތަށް ބަދަލުތަކެއް ގެނެސްފައި ވަނީ އެ ހިދުމަތުގެ އެސިސްޓަންޓް ކޮމިޝަނަރަކު ކަމަށް ޑިޖިޓަލް ޑޭޓާ އަދި ޓެކްނޮލޮޖީގެ ފަރާތުން އޭނާއަށް މައުލޫމާތު ދީފައިވާ ކަމަށެވެ. ނަމަވެސް އެއީ ކޮން އޭސީޕީއެއް ކަމެއް ފާހަގަކުރައްވާފައެއް ނުވެ އެވެ.

އެކަން ރަސްމީކޮށް މިދިޔަ މޭމަހުގެ 29 ވަނަ ދުވަހު ފުލުހުންގެ ސަމާލު ކަމަށް ގެނެސްފައިވާ ކަމަށް ވެސް އެ ސިޓީގައި ޝިފާން ފާހަގަކޮށްފައިވެ އެވެ. 

އަދި ޕީއެސްސީ ސިސްޓަމުގެ އެކްސެސް އޮންނަ ފަރާތަކުން، އެ ސިސްޓަމުގައި ރައްކާކޮށްފައި ހުރި ބައެއް މައުލޫމާތާއި، ހަގީގަތާ ހިލާފު އެތައް މައުލޫމާތެއް ރަސްމީ އިދާރާތަކާއި އަދި ބައެއް ނޫސްތަކާ ވެސް ހިއްސާކޮށްފައިވާ ކަމަށް އެ ސިޓީގައި އޭނާ ފާހަގަކުރައްވާފައިވެ އެވެ. އެހެންކަމުން އެ މައްސަލަ ބަލައިދިނުމަށް ވަނީ އެދިފަ އެވެ.

ޑެޕިއުޓީ ކޮމިޝަނަރު ފަރުހާދަށް ކުރާ ތުހުމަތުތަކުގެ ތެރޭގައި، އޭނާގެ ދަރިފުޅަށް ތުހުމަތުކުރި މައްސަލައެއްގައި ހެކި ނައްތާލަން މަސައްކަތް ކުރުމާއި، މަގާމުގެ ނާޖާއިޒު ބޭނުން ހިފި ކަމުގެ ސީރިއަސް ތުހުމަތުތަކެއް ހިމެނެ އެވެ.