ހަނިމާދޫ އެއާޕޯޓާއެކު ފަހިވާ "ރަނުގެ ފުރުސަތުތަކުގެ" ބޭނުން ހިފަން ރައީސްގެ ދައުވަތު

ހަނިމާދޫ އިންޓަނޭޝަނަލް އެއާޕޯޓު މިރޭ ހުޅުވިގެން ދިޔުމާއެކު މުޅި ސަރަހައްދުގައި އެކި ދާއިރާތަކުން "ރަނުގެ ފުރުސަތުތަކެއް" ހުޅުވިގެން ގޮސްފައިވާ ކަމަށް ވިދާޅުވެ، އެ ފުރުސަތުތަކުގެ ފުރިހަމަ ބޭނުން ހިފުމަށް ރާއްޖެ އާއި ރާއްޖޭން ބޭރުގެ ވިޔަފާރިތަކާއި އިންވެސްޓަރުންނަށް ރައީސް ޑރ. މުހައްމަދު މުއިއްޒު މިރޭ ދައުވަތު ދެއްވައިފި އެވެ.

އެމްބޯ މަޑިއެއްގެ ފަރުމާއަށް ޓާމިނަލް ހަދާފައިވާ ހަނިމާދޫ އިންޓަނޭޝަނަލް އެއާޕޯޓް އިންޑިއާގެ ބޮޑުވަޒީރު ނަރެންދްރަ މޯދީގެ ހާއްސަ މަންދޫބެއްގެ ގޮތުން އެ ގައުމުގެ ސިވިލް އޭވިއޭޝަން މިނިސްޓަރު ރާމް މޯހަން ނައިޑޫ އާއެކު ހުޅުވައި ދެއްވުމުގެ ކުރިން، ވާހަކަފުޅު ދައްކަވަމުން ރައީސް ވިދާޅުވީ، މި އެއާޕޯޓު ވެގެންދާނީ ހދ. އަތޮޅާއި މުޅި އުތުރުގެ ތަރައްގީގެ ދޮރޯއްޓަށް ކަމަށެވެ. 

"މި ދޮރާއްޓަކީ ރާއްޖޭގެ ތަރައްގީ ދެމެހެއްޓެނިވި ގޮތެއްގައި އަދި ހަލުވި މިނުގައި ހާސިލްކުރުމަށް ވަރަށް މުހިންމު ވަސީލަތެއް. މި ރަށާއި މި އަތޮޅާއި ބޮޑު ތިލަދުންމަތީގެ ހުރިހާ ރައްޔިތުންނަށް މި ލިބިގެންދާ ފުރުސަތު އަޅުގަނޑު އެދެނީ ވަރަށް ފުޅާ މިނުގައި އަޅުގަނޑުމެން ބަލައިގަނެ، އޭގެ ބޭނުން ހިފަން ފަށަން،" އެ މަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި، މި ސަރުކާރުން ވެރިކަމާ ހަވާލުވިއިރު، ކުރީގެ ސަރުކާރުގައި ހަދަން ފެށި އެއާޕޯޓުގެ ނިމިފައިވަނީ އެންމެ 30 ޕަސެންޓުގެ މަސައްކަތެވެ. އެ މަނިކުފާނު ވައުދުވެވަޑައިގެންނެވި ގޮތަށް، އެންމެ ދެ އަހަރު ދުވަހުގެ ތެރޭގައި މި ސަރުކާރުން ބާކީ 70 ޕަސެންޓުގެ މަސައްކަތް ނިންމާފައިވާކަން ފާހަގަކުރެއްވި އެވެ.

ހަނިމާދޫ އެއާޕޯޓަކީ ހަމައެކަނި ބިނާއެއް ނޫންކަމަށާއި މިއީ އިންޓަގްރޭޓެޑް ޑިވެލޮޕްމަންޓް ޒޯނެއްގެ ގޮތުގައި އުތުރުގެ އަތޮޅުތައް ތަރައްގީކުރުމަށް އެންމެ މުހިންމު ވަސީލަތެއް ކަމަށް ސިފަކުރައްވައި، ރައީސް ވިދާޅުވީ، މި އެއާޕޯޓާއެކު އުތުރުގެ ފަތުރުވެރިކަމާއި މަސްވެރިކަމާއި ދަނޑުވެރިކަމާއި އިގްތިސާދީ ހުރިހާ ދާއިރާއަކުންނާއި އިޖުތިމާއީ ގޮތުންވެސް ތަރައްގީއާއި ކުރިއެރުން ހޯދުމަށް މަގުފަހިވެގެންދާނެ ކަމަށެވެ. 

"އަޅުގަނޑު އެދެން އެންމެ ފުޅާ މިނުގައި ރާއްޖޭގެ ކުދި، ބޮޑު، މެދުފަންތީގެ ހުރިހާ ވިޔަފާރިވެރިން މި ސަރަހައްދަން ވަޑައިގަންނަވަން. މި ސަރަހައްދުގައި އިންވެސްޓް ކުރައްވަން. މި އޮޕަޯޗުނިޓީގެ ބޭނުން ހިއްޕަވަން. މިއީ ވަރަށް ބޮޑު ރަނުގެ ފުރުސަތެއް. ހުރިހާ ދާއިރާއަކުންވެސް. ސަރުކާރުން މިއޮތީ ތައްޔާރަށް ހުރިހާ ގޮތަކުން އަޅުގަނޑުމެންނަށް ކަންކަން ފަހިކޮށްދެވޭނެ ހުރިހާކަމެއް ކޮށްދޭން،" ރައީސް ވިދާޅުވި އެވެ.

މި މަޝްރޫއުގެ މަސައްކަތް ކުރީ ހުޅުމާލޭގައި ފްލެޓް ވެސް އަޅާފައިވާ އިންޑިއާގެ ޖޭއެމްސީ ކުންފުނިންނެވެ.

ޓާމިނަލް ތައްޔާރު ކުރަމުން ގެންދަނީ އެއް ފަހަރާ 1.3 މިލިއަން މީހުންނަށް ހިދުމަތް ދެވޭ ވަރުގެ ތަނެއްގެ ގޮތުގަ އެވެ. މީގެ އިތުރުން އޮޕަރޭޝަން ފަސޭހަ ކުރުމަށްޓަކައި ބެޖޭޖު ހޭންޑްލް ކުރަން ބިމުގެ އަޑީގައި އޮޓަމެޓިކް ބީއެޗްއެސް އަންޑަ ގްރައުންޑް ސިސްޓަމެއް ގާއިމްކޮށްފައި ހުންނާނެ އެވެ.