ދައުލަތަށް ނުދައްކާހުރި ފައިސާ އިތުރުވީ މީރާގެ ބާރުތައް ފިނޭންސަށް ނެގުމުން: އޮޑިޓާ

ދައުލަތަށް ނުދައްކާހުރި ފައިސާ އިތުރުވީ މިހާރު ބޮޑުތަނުން އިތުރުވެފައިވަނީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގައި ހުރި ބާރުތައް ފިނޭންސްގެ އަތްމައްޗަށް ނެގުމުން ކަމަށް އޮޑިޓަ ޖެނެރަލް ވިދާޅުވެއްޖެ އެވެ.

ދައުލަތަށް ނުލިބި ހުރި ފައިސާ ހޯދަން މަސައްކަތް ކުރުމާ ބެހޭ ގޮތުން ބަޖެޓު ކޮމެޓީގެ ބައްދަލުވުމުގައި މިއަދު ވާހަކަ ދައްކަވަމުން އޮޑިޓަ ޖެނެރަލް ހުސެއިން ނިޔާޒީ ވިދާޅުވީ ދައުލަތަށް ލިބެން ޖެހޭ ފައިސާގެ އަދަދު އިތުރު ވެގެން ދިޔަ މައިގަނޑު ސަބަބަކީ މީރާގެ އެންފޯސްމަންޓް ބާރުތައް ނެގުމުންނެވެ. އަދި ނުލިބި ފައިސާ ހޯދެން އޮތީ މީރާގެ ގާނޫނުން ބާރުތައް މީރާއަށް ދީގެންކަން އޮޑިޓަ ޖެނެރަލް ފާހަގަ ކުރެއްވި އެވެ.

ނިޔާޒީ ވިދާޅުވީ ޖޫރިމަނާއަކީ ރެގިއުލާ އިންކަމްއެއްގެ ގޮތުގައި ނުބެލުނު ނަމަވެސް މިކަން ކުރަން ޖެހޭކަން ފާހަގަ ކުރެއްވި އެވެ.

މީރާގައި އޮތް ތަންފީޒީ ބާރުތައް ފިނޭންސް މިނިސްޓަރުގެ ބާރުގެ ދަށަށް ނެންގެވީ ކުރީގެ ފިނޭންސް މިނިސްޓަރު އިބްރާހިމް އަމީރު އެވެ. 

ތަފާސް ހިސާބުތަކުން ދައްކާ ގޮތުގައި މި އަހަރު ސެޕްޓެމްބަރުގެ މީރާ އަށް ނުލިބި ހުރި ފައިސާ އަދަދު 16 ބިލިއަން ރުފިޔާ އަށް އަރަ އެވެ. މީގެތެރޭގައި ހިމެނެނީ ޓެކުހާއި ޖޫރިމަނާގެ ގޮތުގައި ލިބެން ޖެހޭ 6.7 ބިލިއަން ރުފިޔާ އާއި ޓެކްސް ނޫން ދާއިރާތަކުން ލިބެން ޖެހޭ 9.7 ބިލިއަން ރުފިޔާ އެވެ. މީގެ އިތުރުން ކަސްޓަމްސްގެ ހިސާބުތަކަށް ބަލާއިރު ލިބެން ޖެހޭ ފައިސާ ވަނީ އިތުރުވެފަ އެވެ. އަދި ދުންފަތުގެ ޖޫރިމަނާގެ ގޮތުގައި ލިބެން ޖެހޭ 606 މިލިއަން ރުފިޔާ ލިބެން ޖެހެ އެވެ.