އަމިއްލަ ކުންފުނިތަކަށް 2.7 ބިލިއަން ރުފިޔާގެ މަޝްރޫއު ހަވާލުކޮށްފި

އިގްތިސޯދު ބާރަށް ހިންގުމުގެ ގޮތުން އަމިއްލަ 50 އަށްވުރެ ގިނަ ކުންފުންޏަށް 206 މަޝްރޫއެއް ހަވާލުކޮށްފި އެވެ. 

ބަސެލޯސް ނަސަންދުގެ ޕެލަސް ހޮޓެލްގައި މިއަދު ބޭއްވި ރަސްމިއްޔާތެއްގައި ސަރުކާރުގެ ތަރައްގީގެ މަޝްރޫއުތަކުގެ ގޮތުގައި ހިންގަން ހަވާލުކޮށްފައިވާ މަޝްރޫއުތަކުގެ ތެރޭގައި 53 ކުންފުންޏަކަށް މަޝްރޫއު ހަވާލުކޮށްފައިވެ އެވެ. ހުރިހާ މަޝްރޫއުތަކެއް ހިސާބުކޮށްލުމުން މި މަޝްރޫއުތަކުގެ އަގު ގާތްގަނޑަކަށ 2.7 ބިލިއަން ރުފިޔާއަށްވުރެ މައްޗެވެ. 

މި މަޝްރޫއުތަކަކީ ކޮންޓްރެކްޓާ ފައިނޭންސިން މަޝްރޫއެކެވެ. މި އެއްބަސްވުންތަކުގައި ސޮއިކުރީ މި މަޝްރޫއުތައް ނިސްބަތްވާ މިނިސްޓްރީތަކުގެ ވެރިންންނެވެ. މި ރަސްމިއްޔާތުގައި ދައުލަތުގެ ވަޒީރުންނާއި ރައްޔިތުން މަޖިލީހުގެ ރައީސް އަދި ރައީސް ޑރ. މުހައްމަދު މުއިއްޒުވެސް ބައިވެރިވަޑައިގެންނެވި އެވެ. 

އެންމެ ގިނަ މަޝްރޫއު ހަވާލުކޮށްފައިވަނީ ސްޕޯޓްސް އެންޑް ފިޓްނަސް މިނިސްޓްރީއާ ގުޅުންހުރި ދާއިރާތަކުންނެވެ. މި ދާއިރާތަކުން 52 މަޝްރޫއު ހިމެނެ އެވެ. އަދި ދެވަނަ އަށް އެންމެ ގިނަ މަޝްރޫއު ހަވާލުކުރީ ހޯމްލޭންޑް ސެކިއުރިޓީއާ ގުޅުންހުރި ދާއިރާތަކުންނެވެ. އެ ދާއިރާއިން 39 މަޝްރޫއެއް ހަވާލުކޮށްފައިވެ އެވެ. 

އަންނަ އަހަރުން ފެށިގެން ހިންގަން ފަށާ މަޝްރޫއުތަކުގެ ތެރޭގައި މިއަދު ހަވާލުކުރި ގިނަ މަޝްރޫއުތަކުގެ ތެރޭގައި ހިމެނީ ބޯހިޔާވަހިކަމުގެ މަޝްރޫއުތަކެވެ. މި މަޝްރޫއުތަކުގެ ތެރޭގައި 24 ހައުސިން މަޝްރޫއެއް ވެސް ހިމެނެ އެވެ. ގިނަ މަޝްރޫއުތައް ހިންގަން ހަވާލުކޮށްފައިވަނީ ރަށްރަށުގަ އެވެ. މާލޭގައި ހިންގަން ހަވާލުކޮށްފައިވަނީ އެންމެ މަޝްރޫއު އެކެވެ. 

މި 206 މަަޝްރޫއުގެ ތެރޭން އެންމެ ގިނަ މަޝްރޫއުތައް ހަވާލުކޮށްފައިވަނީ ކްރޯލައިން ޕްރައިވެޓް ލިމިޓެޑް ކުންފުންޏަށެވެ. އެ ކުންފުންޏަށް 11 މަޝްރޫއެއް ހަވާލުކޮށްފައިވެ އެވެ. މި މަޝްރޫއުތަކުގެ އަގު 27 މިލިއަން ރުފިޔާއަށް އަރަ އެވެ. މި ކުންފުންޏަކީ 2016 ވަނަ އަހަރު އުފެއްދި ކުންފުންޏެކެވެ. އަދި އަގުގެ ގޮތުން އެންމެ ބޮޑު މަޝްރޫއެއް ހަވާލުކޮށްފައިވަނީ ހަތަރު ޕްރޮޖެކްޓް ހަވާލުކުރި އަލްޓެކް މޯލްޑިވްސް ކުންފުންޏެވެ. އެ ކުންފުންޏަށް ހަވާލުކުރި މަޝްރޫއުގެ އަގު 285 މިލިއަން ރުފިޔާއަށް އަރަ އެވެ. މި ކުންފުންޏަކީ 2004 ވަނަ އަހަރު އުފެއްދި ކުންފުންޏެކެވެ.

އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި ޕީއެސްއައިޕީ މަޝްރޫއުތަކަށް 9.3 ބިލިއަން ރުފިޔާ ކަނޑައަޅާފައިވެ އެވެ.