އަންނަ އަހަރު ނިމޭއިރު ރާއްޖޭގެ ރިޒާވް ހުންނާނީ ބިލިއަނަކާ ގާތުގައި

އަންނަ އަހަރު ނިމޭއިރު ރާއްޖޭގެ ޖުމްލަ ރިޒާވް އެއް ބިލިއަން ޑޮލަރާ ގާތަށް އުފުލޭނެ ކަމަށް އަންނަ އަހަރަށް ލަފާކޮށް ހުށަހެޅި ބަޖެޓުގައި އަންދާޒާކޮށްފި އެވެ. 

އަންނަ އަހަރަށް ލަފާކުރާ ބަޖެޓު ބަޔާން ފިނޭންސް މިނިސްޓަރު މޫސާ ޒަމީރު ވަނީ ބުރާސްފަތި ދުވަހު ރައްޔިތުން މަޖިލީހަށް ހުށަހަޅުއްވާފަ އެވެ. އަންނަ އަހަރުގެ ބަޖެޓުގައިވާ ގޮތުން އަންނަ އަހަރު ނިމޭއިރު ރާއްޖޭގެ ޖުމްލަ ރިޒާވް ހުންނާނީ އެއް ބިލިއަން ޑޮލަރާ ގާތުގަ އެވެ. އަހަރު ނިމޭއިރު ޖުމްލަ ރިޒާވް 903.7 މިލިއަން ޑޮލަރުގައި ހިފެހެއްޓޭނެ އެވެ. - މި އަހަރު ނިމޭއިރު ރިޒާވް ހުންނާނީ 848.6 މިލިއަން ޑޮލަރުގަ އެވެ. 

ރިޒާވް މަތިވާނެ ކަމަށް ބެލެވޭ ސަބަބުތަކުގެ ތެރޭގައި ބޭރު ފައިސާގެ ގާނޫނާއި ގަވައިދުތަކަށް ގެނެވުނު ބަދަލާއެކު ރަސްމީ ރިޒާވަށް ވަންނަ އަދަދު ވަނީ އިތުރުވެގެން ގޮސްފައިވުން ހިމެނެ އެވެ. 

ބޭރުކުރެވޭ ރިޒާވްއަށް ވާނެ ގޮތް - މަރުކަޒީ ބޭންކުގެ ހިސާބުތައް ދައްކާ ގޮތުގައި ރާއްޖޭގެ ބޭނުން ކުރެވޭ ރިޒާވްގައި ނުވަތަ ޔޫޒަބަލް ރިޒާވްގެ ގޮތުގައި އެންމެ ފަހުން ހުރީ 200 މިލިއަން ޑޮލަރެވެ. މި އަހަރުގެ ޖުލައި މަހު ރާއްޖޭގެ ޔޫޒަބަލް ރިޒާވްގައި ހުރީ 213.22 މިލިއަން ޑޮލަރެވެ. އަދި އޮގަސްޓް މަހު 188.64 މިލިއަން ޑޮލަރަށް ވެއްޓުމަށްފަހު ސެޕްޓެމްބަރު މަހު ހުރީ 194 މިލިއަން ޑޮލަރެވެ. އެވްރެޖުކޮށް ހުންނަނީ 200 މިލިއަން ޑޮލަރެވެ. އަންނަ އަހަރުވެސް ޔޫޒަބަލް ރިޒާވް ހުންނާނީ މި އަދަދުގައި ކަމަށް ބެލެވެ އެވެ. ނަމަވެސް އަންނަ އަހަރަކީ ރާއްޖޭން ބޮޑު ދަރަންޏެއް ދައްކަން ޖެހޭ އަހަރަކަށްވުމާއެކު ނެޓް ޔޫޒަބަލް ރިޒާވްގެ އަދަދު ބޮޑުނުވެ ނުވަތަ ދަށްވުމުގެ ފުރުސަތު އޮންނާނެ އެވެ.  ޔޫޒަބަލް ރިޒާވްއަކީ އޮފިޝަލް ރިޒާވް ގެ އަދަދުން، ދައުލަތަށް ކުރު މުއްދަތެއްގެ ތެރޭގައި ދައްކަންޖެހޭ ބޭރު ފައިސާގެ ދަރަނި އުނިކުރުމަށް ފަހު މަރުކަޒީ ބޭންކަށް ހުންނަ ބޭރު ފައިސާގެ އަދަދެކެވެ.