ބާ އަތޮޅު ހިމާޔަތްކުރާ ތިމާވެށީގެ ފަންޑު 13 އަހަރު އޮޔާދާން ދޫކޮށްލާފައި

ތިމާވެށީގެ ގޮތުން ރައްކާތެރިކަންދީ، ޔުނެސްކޯ އިން ހިމާޔަތްކޮށްފައިވާ ސަރަހައްދެއްގެ ގޮތުގައި ބ. އަތޮޅު ކަނޑައަޅާފައި އޮތަސް، އެ އަތޮޅުން ހިމާޔަތްކުރި ސަރަހައްދުތައް ނުބެލެހެއްޓުމާއި މެނޭޖު ކުރުން އޮތީ އިންތިހާއަށް ދޯދިޔާކޮށެވެ. އަދި އެތަނުގެ ކޮންޒަވޭޝަން ޓްރަސްޓް ފަންޑު 13 އަހަރު ނުބެލެހެއްޓި އޮތްކަން އޮޑިޓުން ހާމަވެއްޖެ އެވެ. 

ބ. އަތޮޅުން ހިމާޔަތްކޮށްފައިވާ ސަރަހައްދުގެ ތިމާވެށީގެ އޮޑިޓް ހަދައި އޮޑިޓަ ޖެނެރަލް ނެރެފައިވާ ރިޕޯޓުގައިވާ ގޮތުން އެ އަތޮޅުގެ 14 ސަރަހައްދެއް ގުދުރަތީ ގޮތުން ހިމާޔަތްކޮށްފައި އޮތްއިރު، 2012 ވަނަ އަހަރު ބަޔޮސްފިޔާ ރިޒާވް ރަސްމީކޮށް އިފްތިތާހުކޮށްފައިވެ އެވެ. އަދި ބަޔޮސް ފިޔާ ރިޒާވުން ލިބޭ އާމްދަނީ ޖަމާކުރަން ކޮންވަޒޭޝަން ޓްރަސްޓް ފަންޑެއް ވަނީ ގާއިމްކޮށްފަ އެވެ. ނަމަވެސް އެ ފަންޑު ބެލެހެއްޓުން އިންތިހާ އަށް ދޯދިޔާކަން އޮޑިޓަ ޖެނެރަލް ފާހަގަކޮށްފައިވެ އެވެ.

އޮޑިޓަ ޖެނެރަލް ފާހަގަ ކުރައްވާފައިވާ ގޮތުގައި ފަންޑު ހިންގުމާއި ފަންޑު މެދުވެރިކޮށް ހިންގާ މަޝްރޫއުތައް އެންމެ އެކަށީގެންވާ ގޮތުގައި ކުރިއަށް ގެންދަން މަސައްކަތް ކޮށްފައެއް ނެތެވެ. މިގޮތުން ފަންޑުގެ ބޯޑު ބައްދަލުވުންތައް ބާއްވާފައެއް ނެތެވެ. އަދި ބަޖެޓް އެޕްރޫވްކޮށްފައި ނުވުމާއެކު ފަންޑު ކުރިއަރުވަން 2012 އިން ފަހުން އެއްވެސް މަސައްކަތެއް ކޮށްފައެއް ނެތެވެ. އަދި ފަންޑަށް ލިބޭ ފައިސާ އިން ކުރަމުން ގެންދާ މަސައްކަތުގެ ތަފުސީލްތަށް ނެތުމުގެ ސަބަބުން ފަންޑު މެނޭޖު ކުރަމުންދާ ގޮތާމެދު ރައްޔިތުންގެ އިތުބާރު ވަނީ ކުޑަވެފަ އެވެ. 

އޮޑިޓަ ޖެނެރަލް ވަނީ މި މައްސަލަ ހައްލު ކުރަން ފިޔަވަޅު އަޅަން އެދިފަ އެވެ. މިގޮތުން ޓޫރިޒަމް އެންޑް އެންވަޔަރަންމަންޓް އެންވަޔަރުމަންޓް މިނިސްޓްރީ އާއި ތިމާވެށީގެ ރެގިއުލޭޓަރީ އޮތޯރިޓީ (އީޕީއޭ) އާއި ބ. އަތޮޅު ކޮންޒަވޭޝަން ފަންޑު އަދި ބ. އަތޮޅު ކައުންސިލުގެ ރަށު ކައުންސިލުތައް އަދި ބ. އަތޮޅު ބަޔޮސްފިއާ ރިޒާވް އޮފީސް ފަދަ ހުރިހާ މުއައްސަސާތަކުގެ މެދުގައި މައުލޫމާތު އެއްގޮތްކޮށް، އަވަސްކޮށް އަދި ފަސޭހަކަމާއެކު މައުލޫމާތު ބަދަހި ކުރެވޭނެ އުސޫލެއް އެކުލަވާލަން އެދިފައިވެ އެވެ.  މީގެ އިތުރުން އެ އަތޮޅުގެ ހިމާޔަތްކޮށްފައިވާ ސަރަހައްދުތަކާ ގުޅިގެން ލިބޭ އާމްދަނީ ފީ އަދި ކުލީގެ ކަންކަން ބެލެހެއްޓޭނެ ހަރުދަނާ އިންތިޒާމުތަކެއް ހަމަޖެއްސުން ވެސް ހިމެނެ އެވެ. 

މީގެ އިތުރުން ބ. އަތޮޅު ބަޔޮސްފިއާ ރިޒާވްގެ ތެރޭގައި ޖޫން 5، 2011 ގައި ހިމާޔަތްކޮށްފައި އޮތް ރަށެއް ކަމަށްވާ ބ. ބަލަތާ ކުރީގެ ކުއްޔަށް ދިނުމުގެ އެއްބަސްވުމެއް ބާތިލުނުކޮށް، 2013 ވަނަ އަހަރު ޓޫރިޒަމް ބޭނުމަށް 20 އަހަރުގެ މުއްދަތަށް ކުއްޔަށް ދީފައިވުން ހިމެނެ އެވެ. އަދި ރަށުގެ ބޮޑުމިނާ ގުޅިގެން ނަގަންޖެހޭ ކުލި، އެއްބަސްވުމުގައިވާ ގޮތަށް މޯލްޑިވްސް އިންލޭންޑް ރެވެނިއު އޮތޯރިޓީ އަށް ރިޕޯޓުނުކުރެވުމުގެ ސަބަބުން، ކުލި ހިސާބުކޮށްފައި ނެތެވެ. އަދި ބަތަލާގައި ގޮނޑުދޮޑް ބިން ހިމާޔަތް ކޮށްފައިވަނީ އީޕީއޭއަށް ބޭނުންވާ ހުއްދަތައް ނުގަގައި، ގަވާއިދާ ހިލާފަށެވެ.