ފުލުސް ސެކިއުރިޓީއާއެކު ތިއްބައި ވީއައިއޭއިން ފައިސާ ފޭރިގެންފި

މޫނު ނިވާކޮށްގެން ތިބި ބަޔަކު، ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ފުލުހުންގެ ސެކިއުރިޓީއާއެކު ތިއްބައި ދިޔަ ބީއެމްއެލްގެ ފައިސާތަކެއް ފޭރިގަނެގެން ފިލައިފި އެވެ. 

ފުލުހުން ދާދި ދެންމެއަކު ބުނީ މިއަދު ފަތިހު އެއާޕޯޓުން ބޭންކެއްގެ ފައިސާ ހުރި ސޫޓް ކޭހެއް ފޭރިގަތް މައްސަލައެއް ހުށަހަޅާފައިވާ ކަމަށާއި، މި ހާދިސާގެ މައުލޫމާތު ލިބުނީ ފަތިހު 4:45 އެހާކަންހާއިރު އެވެ. އެނގިފައިވާ ގޮތުގައި ފޭރިގެންފައިވަނީ ގައުމީ ބޭންކްއިން އެއާޕޯޓް އޭޓީއެމްއަށް ޖަމާ ކުރަން ގެންދިޔަ ފައިސާ އެވެ. 

މި ހާދިސާގެ މާ ބޮޑު ތަފުސީލެއް ފުލުހުން އަދި ނުދެ އެވެ. ފުލުހުން ބުނެފައި ވަނީ ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލަށް ވަންނަން ދިޔަ ބޭންކެއްގެ ދެ މުވައްޒަފެއްގެ އަތުން ފައިސާ ހުރި ސޫޓް ކޭސްއެއް، މޫނު ނިވާކޮށްގެން ތިބި ބަޔަކު ފޭރިގެންފައިވާ ކަމަށެވެ.

ދަ މިރާ އަށް އެނގިފައިވާ ގޮތުގައި މި ހާދިސާ ހިނގިއިރު ފުލުހުންގެ ސެކިއުރިޓީވެސް ބޭންކް މުވައްޒަފުންނާއެކު ތިއްބެވެ. އެކަންކޮށްފައިވަނީ ވަޅި ހިފައިގެން އައި މީހުން ފުލުސް މީހާ އަށް ބިރު ދެއްކުމަށްފަހު އެވެ. މި މީހުން ފިލާފައިވަނީ ލޯންޗެއްގައި ކަމަށް އެނގިފައިވެ އެވެ. ބޭންކްތަކުން ފައިސާ އުފުލުމުގެ ހިދުމަތް ފުލުހުންދެ އެވެ. މިގޮތުން ފައިސާ އުފުލާއިރު ތިބޭ ފުލުހުން އާއްމުކޮށް ތިބެނީ ބޭނުންވާ ހަތިޔާރު ހިފައިގެންނެވެ. ނަމަވެސް މި ހާދިސާ ހިނގިއިރު ފުލުހުންގެ އަތުގައި ހަތިޔާރު ހުރިތޯ ނުވަތަ ނެތް ކަމެއް ނޭނގެ އެވެ. 

ފައިސާ ފޭރިގެން ބަޔަކު ފިލިއިރު ވީއައިއޭގައި ތިން ލައިނަށް ސެކިއުރިޓީ ތިބެ އެވެ. މިގޮތުން ބޭރު ބަލަހައްޓަން އެމްއޭސީއެލް އިން ސެކިއުޓީ ފޯހެއް މި އަހަރު ވަނީ ތައާރަފުކޮށްފަ އެވެ. އަދި ފުލުހުންގެ އިތުރުން އޭވިއޭޝަން ސެކިއުރިޓީ އާއި ސިފައިންގެ ފައުޖެއްވެސް އެއާޕޯޓުގެ ތެރޭގައި ތިބެ އެވެ.