އައްޑޫ ހިތަދޫގައި ދެމަފިރިން މަރުވެފައި އޮއްވާ ފެނެއްޖެ

އައްޑޫ ސިޓީ ހިތަދޫ ގެއެއްގެ ތެރޭގައި ދެމަފިރިއަކު މަރުވެފައި އޮއްވާ މިއަދު ފެނިއްޖެ އެވެ.

ފުލުހުން ބުނީ ދެ މީހަކު މަރުވެފައިވާ މައްސަލައެއް ހުށަހެޅުމާ ގުޅިގެން ފުލުހުން ހަރަކާތްތެރިވަމުންދާ ކަމަށެވެ. 

މަރުވެފައި ވަނީ އެރަށު ކުރޭންގެ، އިބްރާހިމް އަބްދުﷲ 60، އަދި މަރަދޫ، ނާރެސް، ފަރަހަނާޒް ރަޝީދު 52، އެވެ. ފުލުހުން ބުނީ މިހާތަނަށް ބެލި ބެލުމުން ތުހުމަތު ކުރެވޭ ކަމެއް ފާހަގަކުރެވިފައި ނެތް ކަމަށެވެ.

އެ ދެމަފިރިން މަރުވެފައި އޮއްވާ ފެނުނީ އެމީހުން ހޯދަން އެގެއަށް ދިޔަ އާއިލާގެ ބަޔަކަށެވެ.

އެނގިފައިވާ ގޮތުގައި ދެމަފިރިންގެ ހަށިގަނޑު ފެނުނީ އެމީހުން ދިރިއުޅޭ ގޭގެ ކޮޓަރި ތެރެއިންނެވެ. އެއީ އަލަށް ހަދަމުންދާ ގެއެކެވެ. އެމީހުން އެ ގެއަށް ބަދަލުވީ ވެސް ވަރަށް ފަހުންނެވެ.

އެ ގެއަށް ކަރަންޓު ދޫކޮށްފައި ހުރީ ޖެނެރޭޓަރެއް ބޭނުންކޮށްގެންނެވެ. ދެމަފިރިން މަރުވީ ކަރަންޓު ޝޮކެއް ޖެހިގެން ކަމަށް މައުލޫމާތު ލިބެ އެވެ. ނަމަވެސް އެކަން ފުލުހުން ކަށަވަރުކޮށްދީފައެއް ނުވެ އެވެ.

ފުލުހުން ގެންދަނީ މި މައްސަލަ ތަހުގީގު ކުރަމުންނެވެ.