އެމްއެމްއޭއިން ރިސާޗް ފަންޑުން ދިރާސާތަކަށް ފުރުސަތު ހުޅުވާލައިފި

އެމްއެމްއޭގެ ރިސާޗް ފަންޑުގެ ދަށުން، އިގްތިސޯދީ އަދި މާލީ ދާއިރާއާށް ހާއްސަ ދިރާސާތަކަށް ގްރާންޓް ދިނުމަށް ކަނޑައަޅައި، ޕްރޮޕޯސަލްތައް ހުށަހެޅުމުގެ ފުރުސަތު ހުޅުވާލައިފި އެވެ.

އެމްއެމްއޭ އިން ބުނީ ރިސާޗް ފަންޑުގެ ދަށުން ރިސާޗް ޕްރޮޕޯސަލްތަކަށް ހުޅުވާލައި އިންޑިޕެންޑެންޓް ރިސާޗް ގްރާންޓާއި ކޮލަބޮރޭޓިވް ރިސާޗް ގްރާންޓް އަދި ފޮތް ގްރާންޓަށް ޕްރޮޕޯސަލް ހުށަހަޅާ ފަރާތްތަކަށް ޖުމްލަ އެއް މިލިއަން ރުފިޔާގެ ފަންޑަކުން ފެށި މި ރިސާޗް ގްރާންޓުތަކުގެ މަގްސަދަކީ ރާއްޖެއަށް ދިމާވާ އިގްތިސޯދީ، މާލީ އަދި ތަރައްގީގެ މައްސަލަތައް ތަހުލީލީ ނަޒަރަކުން ދެނެގަނެ އެ މައްސަލަތަކަށް އިޖާދީ ހައްލުތައް ހޯދުމަށް މަގުފަހިކުރުން ކަމަށެވެ.

މި ފަންޑު މެދުވެރިކޮށް އެމްއެމްއޭއިން ބޭނުންވަނީ ގައުމުގެ އިގްތިސޯދީ ސިޔާސަތު އެކުލަވާލާ ފަރާތްތަކާއި އެކަޑަމިކް ދާއިރާގައި މަސައްކަތްކުރާ ފަރާތްތައް އަދި ދިރާސާކުރާ ފަރާތްތައް އެކުއެކީގައި މާލީ އަދި އިގްތިސޯދީ މައްސަލަތަކަށް ހައްލު ހޯދުމުގައި އެހީތެރިކަން ފޯރުކޮށްދިނުމެވެ.

މި ގްރާންޓަށް ޕްރޮޕޯސަލް ހުށަހެޅޭނީ އަމިއްލަ ފަރުދުންނަށާއި، ތައުލީމީ ދާއިރާގެ ފަރާތްތަކަށާއި ތިންކް ޓޭންކްތައް އަދި އެމްއެމްއޭގެ މުވައްޒަފުންނާ ގުޅިގެން މަސައްކަތްކުރުމަށް ބޭނުންވާ ތަޖުރިބާކާރު ދިރާސާވެރީންނަށެވެ.

ޝަރުތު - އިންޑިޕެންޑެންޓް ރިސާޗް ގްރާންޓަށް އެދި ހުށަހަޅާ ވަކިވަކި ފަރުދުންނާއި މުއައްސަސާތަކުން ހުށަހަޅާ ޓީމްތައް ލީޑް ކުރާ ފަރާތް ވާން ވާނީ މާސްޓާސް ޑިގްރީއެއް ނުވަތަ އެއަށް ވުރެ މަތީ ފާހެއް އޮންނަ ފަރާތަކަށެވެ. އަދި ގްރާންޓަށް ކުރިމަތިލާ ދާރިސުންގެ ޕީއެޗްޑީ އޮތުމަށް އެމްއެމްއޭ އިން ބާރު އަޅައެވެ. ކޮލަބްރޭޓިވް ރިސާޗްގެ ކެޓެގަރީން ޕްރޮޕޯސަލް ހުށަހަޅާ ފަރާތްތަކުގެ ޕްރޮޕޯޒަލް ވާންނާނީ އެމްއެމްއޭ މުވައްޒަފުންނާ ގުޅިގެން ހުށަހަޅާ ރިސާޗް ޕްރޮޕޯޒަލްއަކަށެވެ. އަދި އެ ޕްރޮޕޯޒަލްއަކީ އެމްއެމްއޭގެ ސްޓްރެޓީޖިކް ލަނޑުދަނޑިތައް ހާސިލްކުރުމަށް އެހީވެދޭނެ ހުށަހެޅުމަކަށް ވާންވާނެ އެވެ.

ރިސާޗް ގްރާންޓްގެ އިތުރުން، މި ފަންޑުގައި ފޮތް ގްރާންޓްގެ ބައެއް ހިމެނެ އެވެ. މި ބަޔަށް ކުރިން ފޮތް ޝާއިއުކޮށްފައިވާ ނުވަތަ އެއާ އެއްފެންވަރުގެ ތަޖުރިބާ ހުރި ފަރުދުންނަށް ނުވަތަ ޓީމުތަކަށް ހުޅުވާލެވިފައިވެ އެވެ. ފޮތްތައް ދިވެހި ބަހުން ނުވަތަ އިނގިރޭސި ބަހުން ލިޔެވިދާނެ އެވެ. އަދި މާލީ ހޭލުންތެރިކަން އިތުރުކުރުމަށާއި، ރާއްޖޭގެ އިގްތިސޯދާ ބެހޭގޮތުން އާންމުންގެ ހޭލުންތެރިކަން އިތުރުކުރުމަށާއި، މާލީ ސިޔާސަތުތަކާ ބެހޭ ދިރާސާތައް ހިއްސާކޮށްދިނުމަށް ތައްޔާރުކުރާ ފޮތްތަކަށް އިސްކަންދެވޭނެ އެވެ.

ދިރާސާ ޕްރޮޕޯސަލްތައް ހުށަހެޅުމަށް ހުޅުވާލެވިފައިވާ ދާއިރާތަކުގެ ތެރޭގައި މެކްރޯ އިކޮނޮމިކް ސްޓެބިލިޓީއާއި، ފައިސާގެ ސިޔާސަތާއި، މާލީ ދާއިރާގެ ދެމެހެއްޓެނިވިކަމާއި، މޫސުމާއި ދެމެހެއްޓެނިވި ތަރައްޤީއާއި، ޑިޖިޓަލް ފައިނޭންސް އަދި އިންކްލޫޝަންއާއި، އިސްލާމިކް ފައިނޭންސާއި ތައުލީމީ ދާއިރާއާއި ވަޒީފާގެ ބާޒާރު ހިމެނެ އެވެ.

ރިސާޗް ގްރާންޓުގެ ދަށުން ހޮވޭ ޕްރޮޕޯޒަލްއަށް ދިރާސާއާ ގުޅުންހުރި ހަރަދުތައް ކުރުމަށް މާލީ އެހީތެރިކަން ލިބޭނެ އެވެ. މީގެ ތެރޭގައި މަޢުލޫމާތު އެއްކުރުމާއި ފީލްޑްވާކާއި ރިސާޗް އެސިސްޓެންސާއި އަދި ދިރާސާ ޝާއިއުކުރުމުގެ ޚަރަދުތައް ހިމެނެ އެވެ. އަދި އިތުރަށް ލިބޭނެ ފައިދާތަކުގެ ތެރޭގައި ދިރާސާ މަސައްކަތް ޕިއާ ރިވިއު ކުރެވި، އެމްއެމްއޭގެ މުވައްޒަފުންނާއެކު ދިރާސާ ޕަބްލިޝްކުރުމާއި އެމްއެމްއޭ ރިސާޗް ކޮންފަރެންސް ފަދަ ތަންތަނުގައި ދިރާސާ ހުށަހެޅުމުގެ ފުރުޞަތުތައް ހިމެނެ އެވެ.

ރިސާޗް ގްރާންޓުގެ ދަށުން ހޮވޭ ފަރާތްތަކަށް ގްރާންޓްގެ ގޮތުގައި ފޯރުކޮށްދެވޭ މާލީ އެހީތެރިކަމުގެ އިތުރުން ތަފާތު އެކިއެކި ގޮތްގޮތުން ފަންނީ އެހީތެރިކަން އެމްއެމްއޭގެ ފަރާތުން ލިބިގެންދާނެ އެވެ. ރިސާޗް ގްރާންޓުގެ މާލީ އެހީގެ ގޮތުގައި މައުލޫމާތު އެއްކުރުމާއި ފީލްޑްވޯކާއި ރިސާޗް އެސިސްޓެންސާއި އަދި ދިރާސާ ޕަބްލިޝްކުރުމުގެ ހަރަދުތަކަށް މާލީ އެހީތެރިކަން ފޯރުކޮށްދެވޭނެ އެވެ.

ރިސާޗް ގްރާންޓްއަށް ހޮވޭ ފަރާތްތަކަށް ފަންނީގޮތުން ލިބޭނެ އެހީތެރިކަމާ ކުރިއރުން ތަކުގެތެރޭގައި، ގްރާންޓްގެ ދަށުން ކުރާ ދިރާސާ މަސައްކަތްތަކުގެ ޕިއާ ރިވިއު ކުރެވުން، އެމްއެމްއޭގެ މުވައްޒަފުންނާއެކު އެކުގައި ދިރާސާ ޕަބްލިޝްކުރުމާއި، އެމްއެމްއޭ ރިސާޗް ކޮންފަރެންސް ފަދަ ތަންތަނުގައި ދިރާސާ ހުށަހެޅުމުގެ ފުރުސަތުތައް ހިމެނެ އެވެ.

މި ގްރާންޓަށް އެދި އެޕްލިކޭޝަން ހުށަހެޅުމަށް ހަމަޖެހިފައިވަނީ އީމެއިލްގެ ޒަރީއާއިން research@mma.gov.mv އަށެވެ. ޕްރޮޕޯސަލް ހުށަހެޅުމުގެ ސުންގަޑިއަކީ މި މަހުގެ ނިޔަލަށެވެ. 

ޕްރޮޕޯސަލްތައް ރިވިއުކުރާނީ އެމްއެމްއޭގެ އެކަޑަމިކް އެންޑް ޓެކްނިކަލް ރިވިއު ކޮމިޓީންނެވެ. އެ ކޮމިޓީއިން ބަލާނީ ތީމްތަކާއި ދިވެހިރާއްޖޭގެ އިޤްތިސާދާ ގުޅުންހުރި މިންވަރާއި ބިނާކުރަނިވި ހިޔާލެއްކަމުގައިވުމާއި، ދިރާސާކުރުމަށް ބޭނުންންކުރާ އުސޫލުގެ ހަރުދަނާކަމާއި، ދިރާސާކުރާ ފަރާތުގެ ނުވަތަ ޓީމްގެ ޤާބިލުކަން އަދި އެ ދިރާސާއަކުން ސިޔާސަތުތަކަށް އަސަރުކުރާނެ މިންވަރަށެވެ. އެޕްލިކޭޝަންތައް ހުށަހަޅާ ފަރާތްތަކުގެ ތެރެއިން ހޮވޭ ފަރާތްތައް ކަނޑައަޅާ އަންނަ މަހުގެ ނުވަވަނަ ދުވަހުގެ ކުރިން އެފަރާތްތަކަށް އަންގާނެ އެވެ.