"ހުޅިމެންދޫގައި އަޅާ ހޮޓެލް ސްކޫލަކީ ޓޫރިޒަމް ކުރިއެރުވުމަށް އެޅޭ މުހިންމު ފިޔަވަޅެއް"

ލ. ހުޅިމެންދޫގައި ތަރައްގީ ކުރާ ހޮޓެލް ސްކޫލަކީ މުޅި ރާއްޖޭގައި ޓޫރިޒަމް ކުރިއެރުވުމަށް އެޅިގެންދާ މުހިންމު ފިޔަވަޅެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ހުޅިމެންދޫގައި ރިސޯޓަކާއި ހޮޓެއް ސްކޫލް ތަރައްގީ ކުރަން މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) އާއި އެމްއޭސީއެލްއާ ދެމެދު މިއަދު ވަނީ އެއްބަސްވުމުގައި ސޮއިކޮށްފަ އެވެ. މި އެއްބަސްވުމުގައި ސޮއިކޮށްފައި ވަނީ ރައީސް ލ. އަތޮޅަށް ކުރައްވާ ދަތުރުފުޅުގެ ތެރެއިން މާމެންދޫއަށް ވަޑައިގެން ބޭއްވި ޖަލްސާގަ އެވެ.

އެމްއޭސީއެލްގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދެވެ. އަދި އެމްއެންޔޫގެ ފަރާތުން ސޮއިކުރެއްވީ ޑެޕިއުޓީ ވައިސް ޗާންސެލަރު ރަހީމާ އަބްދުއްރަހީމެވެ.

މި ޖަލްސާގައި ވާހަކަ ދައްކަވަމުން ރައީސް ވިދާޅުވީ މިއީ ޓޫރިޒަމްގެ ދާއިރާއިން މީހުން ބިނާކުރުމަށްޓަކައި އެމަނިކުފާނު ވެވަޑައިގަތް މުހިން ވައުދުފުޅެއް ކަމަށެވެ. އެގޮތުން މުޅި ރާއްޖޭގެ ޓޫރިޒަމް ސިނާއަތަށް މި މަޝްރޫއުގެ ސަބަބުން މުހިންމު ކުރިއެރުން ގެނެސްދޭނެ ކަމަށް ވިދާޅުވި އެވެ.

"މި ހޮޓެލް ސްކޫލަކީ މުޅި ގައުމުގެ ފަތުރުވެރިކަމުގެ ސިނާއަތް ކުރިއެރުވުމަށް މުހިންމު ސްކޫލެއް. މީހުން މި ދާއިރާއިން ބިނާކުރުމަށް އެޅޭ މުހިއްމު ފިޔަވަޅެއް،" ރައީސް ވިދާޅުވި އެވެ.

ހުޅިމެންދޫގައި ރިސޯޓަކާއި ޓްރެއިނިން ސްކޫލެއް އަޅަން ޓޫރިޒަމް މިނިސްޓްރީން އެމްއެންޔޫއާ ހަވާލު ކޮށްފައި ވަނީ ނޮވެމްބަރު 10، 2024 ގައެވެ. މި ސްކޫލްގެ ބޭނުމަކީ އެ ރަށުގައި ޓޫރިސްޓުންނަށް ހިދުމަތް ދިނުމުގެ އިތުރުން އެ ދާއިރާއިން މީހުންނަށް ކިޔަވައިދީ ފަންނީ މީހުން ބިނާކުރުމެވެ.

މި ހޮޓެލް ސްކޫލުން ކިޔަވާ ނިމޭއިރު ދަރިވަރުންނަށް މަސައްކަތުގެ ތަޖުރިބާ ވެސް ލިބޭނެ ކަމަށް ކުރިން ސަރުކާރުން ބުނެފައިވެ އެވެ.