ފުވައްމުލަކު އެއާޕޯޓް ފެންސް މަތިން އަރަން އުޅެނިކޮށް ހުއްޓުވި ސެކިއުރިޓީއަށް ހަމަލާދިން މައްސަލައެއް

ފުވައްމުލަކު ސިޓީ އެއާޕޯޓްގެ ފެންސް މަތިން އަރަން އުޅެނިކޮށް އެމީހުން ހުއްޓުވި ސެކިއުރިޓީ މުވައްޒަފަށް ހަމަލާދިން މައްސަލައިގައި ބަޔަކު ހައްޔަރު ކޮށްފި އެވެ.

ފުލުހުން ބުނީ އެއާޕޯޓްގެ ފެންސް މަތިން އަރަނިކޮށް އެމީހުން ހުއްޓުވި ސެކިއުރިޓީ މުވައްޒަފަށް ހަމަލާދީ މާރާމާރީ ހިންގި މައްސަލަ ރިޕޯޓް ކޮށްފައި ވަނީ މިދިޔަ މަހުގެ 28 ވަނަ ދުވަހުގެ ފަތިހު 4:05 އެހާކަށްހާއިރު ކަމަށެވެ.

މި މައްސަލައިގައި އެ ސިޓީއަށް ނިސްބަތްވާ ތިން މީހަކު މިދިޔަ އަންގާރަ ދުވަހު ވަނީ ހައްޔަރު ކޮށްފަ އެވެ. އެއީ ހޯދަޑު، ގުލުކޯޒުގެ، ހަސަން ހުމާމް މުހައްމަދު 28، އާއި ހޯދަޑު، ޒަމްހަރީރުގެ، އިބްރާހިމް ސިމާން އަހުމަދު 28، އާއި ފުނާޑު، ސުހާނާގެ، ބައްސާމް ސައީދު 29، އެވެ.

އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 15 ދުވަހަށް ބަންދު ކުރުމަށް ވަނީ އަމުރުކޮށްފަ އެވެ.

މައުލޫމާތު ލިބޭ ގޮތުގައި ފެންސް މަތިން އަރަން އުޅުނީ ފުވައްމުލަކުގައި ހަރަކާތްތެރިވާ ކުށްކުރާ ގުރޫޕެއްގެ ބައެކެވެ. މި މައްސަލަ ފުލުހުން ދަނީ ތަހުގީގު ކުރަމުންނެވެ.