ޝަންގްރިއް-ލާ ހުޅުވާނެ ތާރީހު ޖަހައިފި

ހުއްޓިފައި އޮންނަތާ ގިނަ ދުވަސްތަކެއްވީ ޝަންގްރިއް-ލާ ވިލިނގިލި މި އަހަރު ހުޅުވަން އާ ތާރީހެއް ޖަހައި، ޑިސެމްބަރު އެއްވަނަ ދުވަހު ހުޅުވާނެކަން ސަރުކާރުން އިއުލާނުކޮށްފި އެވެ. 

ޓޫރިޒަމާއި ތިމާވެށި އެއްކޮށް ބަލަހައްޓަވާ މިނިސްޓަރު ތޯރިގް އިބްރާހިމް މިއަދު ވިދާޅުވީ ޝަންގްރިއް- ލާގެ ވެރިންނާއެކު ކުރެވުނު މަޝްވަރާތަކުގެ ނަތީޖާއެއްގެ ގޮތުން މި އަހަރުގެ ޑިސެމްބަރު 31 ގައި އެ ރިސޯޓް އޮޕަރޭޝަނަށް ގެންނަން އެއްބަސްވެފައިވާ ކަމަށެވެ. 

މިރާ އަށް އެނގިފައިވާ ގޮތުގައި ސަރުކާރުން ވަނީ ޝަންގްރިއް-ލާ ވިލިނގިލި ރިސޯޓް ހުޅުވަން ޝަންގްރިއް-ލާ ކުންފުންޏަށް އެންމެ ފަހުގެ ނޯޓިސް ދީފައިވަނީ މިދިޔަ މަހު އެވެ. އެނގިފައިވާ ގޮތުގައި އެ ކުންފުންޏަށް ހުޅުވަން ދީފައިވަނީ އެއް މަސް ދުވަހުގެ މުހުލަތެކެވެ. އަދި އޭގެ ފަހުން ސަރުކާރުން ވަނީ މި ރިސޯޓް ޝަންގްރިއް-ލާ ކުންފުނީގެ އަތުން ނެގުމުގެ މަސައްކަތް ފަށަން ނިންމާފަ އެވެ. އެ ކުންފުނިން ނެގޯޝިއޭޓް މޭޒު ދޮށަށް ގޮސް ގޮތެއް ނިންމީ އެހެންވެ އެވެ. 

ސަރުކާރުން ވަނީ ޝަންގްރިއް-ލާ ވިލިނގިލި ރިސޯޓް ހުޅުވަން ގިނަ މަސައްކަތްތަކެއް ކޮށްފަ އެވެ. މިގޮތުން ހުޅުވިދާނެ ފުރުސަތަކަށް ބަލައި ރައީސް އިބްރާހިމް މުހައްމަދު ސޯލިހުގެ ވެރިކަމުގައި ޝަންގްރިއް-ލާގައި އޮތް ސަރުކާރުގެ ހިއްސާވެސް ދޫކޮށްލި އެވެ. 

ޝަންގްރިއް-ލާ ހުޅުވަން ގިނަ އަޑު ތަކެއް ރައީސް ސޯލިހުގެ ސަރުކާރުގައި ވެސް އިއްވި އެވެ. ރައްޔިތުންގެ މަޖިލީހުން ޓޫރިޒަމް ގާނޫނަށް ބަދަލު ގެނެސް ގަވާއިދުތައް ބަދަލު ކޮށްގެން އެކަންކަން ހިންގާލުމުން ހީވީ ދެންމެ ޝަންގްރިއް-ލާ ހިނގައިގެންފާނެހެނެވެ. އެކަމަކު އެ ރިސޯޓުގައި އޮތް ސަރުކާރުގެ 30 ޕަސެންޓް ހިއްސާ ދޫކޮށްލީ މިދިޔަ އަހަރުގެ އޯގަސްޓް 28 ގަ އެވެ. 

އައްޑޫ ރައްޔިތުން އެދެމުން ދިޔައީ ގާވެފައި އޮތް އައްޑޫގެ އެންމެ ބޮޑު އެސްޓް ޝަންގްރިއްލާ ހުޅުވޭނެ ގޮތެއް ހަދައިދިނުމެވެ. ޝަންގްރިއް-ލާގައި އޮތީ ސަރުކާރުގެ 30 ޕަސެންޓް ހިއްސާ އެވެ. އަދި ބާކީ ހިއްސާ އޮތީ އައްޑޫ އިންވެސްޓްމެންޓް ޕްރައިވެޓް ލިމިޓެޑު ކުންފުނީގަ އެވެ. ހޮންގްކޮންގް ހޮޓާ ވިޔަފާރީގެ އެންމެ ބޮޑު އެއް ކުންފުނި، ޝަންގްރިއް-ލާއާއި ގުޅިގެން އައްޑޫ ވިލިނގިލި ތަރައްގީކޮށް ހުޅުވީ 2005 ވަނަ އަހަރު އެވެ. އެކަމު ހިނގަމުން ނުހިނގަމުން ދިޔަ ރިސޯޓުގައި މަރުތަޅު އެޅުވުނީ ކޮވިޑާ ގުޅިގެނެވެ. އެޅުވުނު އެ ތަޅު ނައްޓަން ހިފި ނަމަވެސް ސަރުކާރުން ކޮށްދޭން ޖެހޭ އެތައް ކަމެއް ބޮނޑިވެ އެކަންކަން އޮތީ ނުވެފަ އެވެ. މި ލިސްޓު އައްޑޫ އެއާޕޯޓުން ފެށިގެން ގައުމީ އެއާލައިންއިން ދޭން ޖެހޭ ހުވަދޫ އައްޑޫ ކަނެކްޝަނާ ހަމައިން ވެސް ނުނިމެނެ އެވެ. މި ސަބަބުތަކާހުރެ ޝަންގްރިއްލާ ވިލިނގިލި 2005 ގައި ހުޅުވިފަހުން ހިންގީ ގެއްލުމުގަ އެވެ. 

ޝަންގްރިއް-ލާ ރިސޯޓް ހުޅުވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.މިދިޔަ އަހަރުގެ ކުރީކޮޅު އޮޕަރޭޝަނަށް ގެންނާނެ ކަމަށް ރައީސް ޑރ. މުއިއްޒު ވަނީ ވިދާޅުވެފަ އެވެ.