މާވަށުގައި ޒުވާނަކު މަރައިލި މައްސަލައިގައި ދައުވާ ކުރަން ފޮނުވައިފި

ލ. މާވަށް، ނަލަހިޔާ، މޫސާ އިބްރާހީމް 29، އަށް ތޫނު އެއްޗަކުން ހަމަލާދީ މަރާލާފައިވާ މައްސަލައިގެ ތަހުގީގު ނިންމައި ދައުވާކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް ފޮނުވައިފި އެވެ.

މި މައްސަލައިގައި މިދިޔަ އަންގާރަ ދުވަހު ދައުވާކުރުމަށް ފޮނުވާފައި ވަނީ ހދ. ނޮޅިވަރަންފަރު، އަސަރީމަންޒިލް، މުހައްމަދު އިބްރާހިމް 29، ގެ މައްޗަށެވެ. ފުލުހުން ބުނީ އެ މައްސަލަ ޕްރޮސެކިއުޓާ ޖެނެރަލްގެ އޮފީހުން ބަލައިގެންފައިވާ ކަމަށެވެ.

މިދިޔަ ޖުލައި މަހުގެ 28 ވަނަ ދުވަހު މޫސާގެ ކަރަށް ވަޅި ޖަހައި މަރާލިކަމުގެ ތުހުމަތުގައި މުހައްމަދު އިބްރާހިމް ހައްޔަރު ކޮށްފައި ވަނީ ހަމައެދުވަހު އެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކޮށްފައި ބެހެއްޓުމަށް ވަނީ އަމުރުކޮށްފަ އެވެ.

މޫސާގެ ކަރަށް ހެރި ވަޅި ފުލުހުން ހޯދާފައި ވަނީ މޫދު އަޑިންނެވެ. ހަމަލާ ދީފައި ވަނީ އެ ދެ މީހުންގެ މެދުގައި ހިނގި މާރާމާރީއެއްގެ ތެރެއިންނެވެ. މާރާމާރީ ހިންގާފައި ވަނީ މަސްތުވާތަކެތީގެ މައްސަލައެއްގަ އެވެ.

މި މާރާމާރީގައި އަނިޔާވި މޫސާ ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ހޮސްޕިޓަލުން މައުލޫމާތު ދީފައިވެ އެވެ.