ބަދަލާއެކު ޑޮލަރުން ދައުލަތަށް ލިބުނު އާމްދަނީއަށް %38 ގެ އިތުރު ވުމެއް

ބައެއް ޓެކްސްތައް ޑޮލަރުން ދެއްކޭ ގޮތަށް ގެނައި ބަދަލާއެކު، ޑޮލަރުން ދައުލަތަށ ލިބުނު އާމްދަނީ 38 ޕަސެންޓް އިތުރު ވެފައިވާ ކަމަށް ދައްކައިފި އެވެ. 

ދައުލަތުގެ ޓެކްސް އިދާރާ، މޯލްޑިވްސް އިލެންޑް ރެވެނިއު އޮތޯރިޓީ (މީރާ) ގެ މައުލޫމާތުތައް ދައްކާ ގޮތުން މިދިޔަ އޮގަސްޓް މަހުގެ ނިޔަލަށް 969 މިލިއަން ޑޮލަރު އާމްދަނީގެ ގޮތުގައި ވަނީ ލިބިފަ އެވެ. މިއީ މިދިޔަ އަހަރު ލިބުނު 700 މިލިއަނ ޑޮލަރުގެ އާމްދަނީއާ އަޅާބަލާއިރު ބޮޑުތަން އިތުރުވެ، 38 ޕަސެންޓުގެ އިތުރުވުމެކެވެ. 

ޑޮލަރުން ބަލައިގަތް އާމްދަނީގެ ތެރޭން ޓެކުހުގެ ގޮތުގައި ޑޮލަރުން ލިބުނު އާމްދަނީ މިދިޔަ މަހުގެ ނިޔަލަށް އުޅެނީ 34 ޕަސެންޓް އިތުރުވެފަ އެވެ. މި އަހަރު 774 މިލިއަން ޑޮލަރުގެ އާމްދަނީގެ ގޮތުގައި ލިބުނުއިރު މިދިޔަ އަހަރު ލިބުނީ 575 މިލިއަން ޑޮލަރެވެ. އަދި ޓެކްސް ނޫން ގޮތްގޮތުން ލިބުނު އާމްދަނީ ވެސް ވަނީ 56 ޕަސެންޓު އިތުރުވެފަ އެވެ. މި އަހަރު ޓެކްސް ނޫން ގޮތްގޮތުން އާމްދަނީގެ ގޮތުގައި 194 މިލިއަން ޑޮލަރު ލިބުނުއިރު، މިދިޔަ އަހަރު ލިބުނީ 124 މިލިއަން ޑޮލަރެވެ. 

މި އަހަރުގެ ބަޖެޓަށް ޓެކްސް ރޭޓްތައް މަތި ކުރި ގްރީން ޓެކުހާއި ޓީޓީއެސްޓީން ލިބުނު އާމްދަނީ ވަނީ މަތިވެފަ އެވެ. އަދި ކުރިން ރުފިޔާއިން ދެއްކުމުގެ އިހުތިޔާރު އޮންނަ އޮތުން ދޫކޮށްލި ޓީޖީއެސްޓީގެ ބަދަލާއެކު ބަލައިގަތް ޓީޖީއެސްޓީގެ އަދަދުވެސް ވަނީ ބޮޑުތަނުން އިތުރުވެފަ އެވެ. 

މި އަހަރުގެ މިހާތަނަށް ދައުލަތަށް ބަލައިގަތް ޖުމްލަ އާމްދަނީގެ ނިސްބަތް އުޅެނީ 22,2 ބިލިއަން ރުފިޔާގަ އެވެ. މިއީ މިދިޔަ އަހަރު ބަލައިގަތް 19.9 ބިލިއަން ރުފިޔާގެ އާމްދަނީއާ އަޅާބަލާއިރު ބޮޑުތަން އިތުރުވުމެކެވެ.