މޭވާ އާއި ތަރުކާރީގެ މައިގަނޑު ބާވަތްތައް ގަނޑުކޮށް ގެނެސް، އެސްޓީއޯއިން ވިއްކަން ނިންމައިފި

ކާޑުގެ އަސާސީ ބާވަތްތަކުގެ އިތުރުން، ރާއްޖޭގައި އެންމެ ގިނައިން ބޭނުންކުރާ މޭވާ އާއި ތަރުކާރީގެ ބާވަތްތައް ގަނޑުކޮށް ގެނެސް، އެސްޓީއޯ މެދުވެރިކޮށް ވިއްކަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު އިއުލާނުކުރައްވައިފި އެވެ.

ރައީސް އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ، ކާޑުގެ ބާވަތްތަކުގެ އިތުރުން، ރާއްޖެއަށް އެންމެ ގިނައިން އެތެރެކުރާ 10 ބާވަތުގެ މޭވާ އާއި 10 ބާވަތުގެ ތަރުކާރީ އަދި މުގު، ބިސް، އަލުވި އެސްޓީއޯއިން ގަނޑުކޮށް އެތެރެކޮށް، ރާއްޖޭގެ ބާޒާރުގައި ވިއްކަން ފެށުމަށް ކެބިނެޓުގެ މަޝްވަރާއާއެކު މިއަދު ނިންމާފައިވާ ކަމަށެވެ.

މިއީ ރާއްޖޭގައި ފުޑް ސެކިޔުރިޓީ ޔަގީންކަން ކަށަވަރުކުރުމަށް މެނިފެސްޓޯގައި ކަނޑައަޅާފައިވާ ސިޔާސަތުގެ ދަށުން ނިންމާފައިވާ ނިންމުމެއް ކަމަށް ވެސް ރައީސް ވިދާޅުވި އެވެ.

ނަމަވެސް، އެސްޓީއޯ މެދުވެރިކޮށް އެތެރެކުރާ މޭވާ އާއި ތަރުކާރީގެ ބާވަތްތަކުގެ ތަފްސީލެއް އެ މަނިކުފާނު ދެއްވާފައެއް ނުވެ އެވެ.

އެސްޓީއޯ މެދުވެރިކޮށް މޭވާ އާއި ތަރުކާރީގެ ބާވަތްތައް ރާއްޖެއަށް ގަނޑުކޮށް އެތެރެކޮށް ވިއްކަން ނިންމާފައިމިވަނީ، ރާއްޖޭގައި އެފަދަ ބާވަތްތަކުގެ އަގުތައް އުފުލި، އެކަމުގެ ކަންބޮޑުވުން ގިނަ ބަޔަކު ފާޅުކުރަމުންދާ ދަނދިވަޅެއްގަ އެވެ.