އެޗްއާރުސީއެމްގެ މެމްބަރުކަމަށް ދެ ބޭފުޅަކު އައްޔަނުކުރައްވައިފި
އެޗްއާރުސީއެމަށް އައްޔަންކުރައްވާފައިވަނީ، މ. ޕޮޕީ، މުހައްމަދު ޝަފީގު މަހްމޫދާއި ސ. ހުޅުދޫ، ސީބްރީޒް އަހުމަދު މަގުސޫމް އެވެ.
ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ މެންބަރުކަމަށް ދެ ބޭފުޅަކު ރައީސް ޑރ. މުހައްމަދު މުއިއްޒު މިއަދު އައްޔަންކުރައްވައިފި އެވެ.
ރައީސް އޮފީހުގައި މިއަދު ހެނދުނު ބޭއްވި ރަސްމިއްޔާތެއްގައި އެޗްއާރުސީއެމަށް އައްޔަންކުރައްވާފައިވަނީ، މ. ޕޮޕީ، މުހައްމަދު ޝަފީގު މަހްމޫދާއި ސ. ހުޅުދޫ، ސީބްރީޒް އަހުމަދު މަގުސޫމް އެވެ.
ހިއުމަން ރައިޓްސް ކޮމިޝަނުގެ މެންބަރުކަމަށް އައްޔަނުކުރެއްވުމުގެ ކުރިން، ދެ ބޭފުޅުންނަށް ކޮމިޝަނުގެ މެންބަރުކަމުގެ ހުވައިލައިދެއްވީ، ސުޕްރީމް ކޯޓުގެ ފަނޑިޔާރު މުހައްމަދު ސަލީމް އެވެ. އަދި، މި ރަސްމިއްޔާތުގައި ރައީސް ވަނީ ހިއުމަން ރައިޓްސް ކޮމިޝަނަށް އަލަށް އައްޔަންކުރެއްވި ދެ މެންބަރުންނާ، އެ މަގާމަށް އައްޔަނުކުރެއްވި ކަމުގެ ލިޔުން ހަވާލުކުރައްވާފަ އެވެ.
އެޗްއާރުސީއެމްގައި ހުސްވެފައިވާ މެމްބަރުކަމުގެ މަގާމަށް މި ދެ ބޭފުޅުން އައްޔަނުކުރަން ރައްޔިތުންގެ މަޖިލީހުން ރުހުންދީފައިވަނީ މިދިޔަ މަހުގެ ފަހުކޮޅެވެ.
ކޮމެންޓް
Republic of Maldives