ރާއްޖޭގެ މެރިކަލްޗާ ކުރިއަރުވަން ޗައިނާ ފުޖިއާންގެ މެރިން ރިސާޗްއާއެކު ސޮޔެއް

ރާއްޖޭގައި މެރިކަލްޗާ ދާއިރާ ދިރާސާކޮށް ކުރިއަރުވަން ޗައިނާ ފުޖިއާންގެ މެރިން ރިސާޗްއާއެކު މެމޮރަންޑަމް އޮފް އަންޑަސްޓޭންޑިން (އެމްއޯޔޫ) އެއްގައި ސޮއިކޮށްފި އެވެ. 

ޗައިނާގައި ބޭއްވި ރަސްމިއްޔާތެއްގައި ރާއްޖޭގެ ފަރާތުން ސޮއިކުރެއްވީ ފިޝަރިޒް މިނިސްޓަރު އަހުމަދު ޝިޔާމް އެވެ. 

ފިޝަރީޒް މިނިސްޓްރީން ބުނީ މޯލްޑިވްސް މެރިން ރިސާޗް އިންސްޓިޓިއުޓާއި ޕީޕަލްސް ރިޕަބްލިކް އޮފް ޗައިނާގެ ފުޖިއަން ފިޝަރީޒް ރިސާޗް އިންސްޓިޓިއުޓާ ދެމެދު ސޮއިކުރި މި އެމްއޯޔޯގެ މަގްސަދަކީ ތިމާވެށްޓާ ރައްޓެހި އެކްވާކަލްޗަރ ޓެކްނޮލޮޖީތައް ގުޅިގެން ތަރައްޤީކޮށް ދެ ގައުމެއްގެ ދެމެދުގައި ސްޓްރެޓެޖިކް އެއްބާރުލުން ހަރުދަނާކޮށް، ދެމެހެއްޓެނިވި ގޮތެއްގައި އެކްވާކަލްޗާ އާއި ކަނޑުގެ ވަސީލަތްތައް ބެލެހެއްޓުމުގެ ދިރާސާތައް ކުރުމެވެ. 

ސަރުކާރުން ދަނީ ރާއްޖޭގެ މެރިކަލްޗާ ދާއިރާ ތަރައްގީކުރަން މަސައްކަތް ކުރަމުންނެވެ. މިގޮތުން ދާދިފަހުން ވަނީ ރަށްތަކެއް މި މަސައްކަތް ކުރަން ބީލަމަށްވެސް ހުޅުވާލާފަ އެވެ.