ރަތްގަނޑު ސަބްމެރިން ކޭބަލެއް ބުރިވެ ޔޫއޭއީގައި ނެޓަށް ބުރޫ އަރައިފި

ރަ ތްގަނޑުގައި އަޅާފައިވާ ސަބްމެރިން ކޭބަލަކަށް ގެއްލުންވެ ޔުނައިޓެޑް އެރެބް އެމިރޭޓްސް (ޔޫއޭއީ) އާއި މެދުއިރުމަތީގެ ގިނަ ގައުމުތަކުގެ އިންޓަނެޓުގެ ހިދުމަތަށް ބުރޫ އަރައިފި އެވެ.  

ޔޫއޭއީގެ ޓެލެކޮމް ކުންފުނި ބުނެފައިވާ ގޮތުގައި އިންޓަނެޓުގެ ހިދުމަތް ފޯރުކޮށްދޭން ރަތްގަނޑުގައި އަޅާފައިވާ ސަބްމެރިން ކޭބަލް މި ހަފްތާ ބަންދުގައި ގެއްލުންވެފައިވާ ކަމަށާ މިކަމުގެ ސަބަބުން އިންޓަނެޓުގެ ހިދުމަތް ލަސްވެފައިވާ ކަމަށެވެ. 

މެދުއިރުމަތީގެ އެންމެ ބޮޑު ޑާޓާ ސެންޓަރު ހިންގާ މައިކްކްރޯސޮފްޓް ހޮނިހިރު ދުވަހުގެ ރޭ ބުނެފައިވާ ގޮތުގައި ރަތް ކަނޑުގައި ކޭބަލް ކެނޑުމުގެ ސަބަބުން މެދުއިރުމަތީގެ ގައުމުތަކުގައި އިންޓަނެޓް ބޭނުންކުރުމުގައި ލަސް ތަކެއް ވަނީ ކުރިމަތިވެފަ އެވެ. މިކަމުގެ ސަބަބުން އެ ކުންފުނީގެ އެޒޫރް ކްލައުޑް ސާވިސްތަކަށް ވަނީ އަސަރުކޮށްފަ އެވެ. އެ ކުންފުނިން އިންޓަނެޓުގެ ހިދުމަތަށް ބުރޫ އެރި ސަބަބެއް ނުބުނެ އެވެ. ނަމަވެސް މި ހިދުމަތް ރީރޫޓްކޮށް އަލުން ދިނުމުގެ މަސައްކަތް ދަނީ ކުރަމުންނެވެ. 

މެދުއިރުމަތީގެ ގިނަ ގައުމުތަކަށް އިންޓަނެޓުގެ ހިދުމަތްދޭ ސަބްމެރިން ކޭބަލަށް ގެއްލުންވި ސަބަބެއް ނޭނގުނު ނަމަވެސް މި ކޭބަލަށް ޔަމަނުގެ ހޫތީންގެ ހަމަލާއެއް އަތުވެދާނެ ކަމުގެ ބިރުވެރިކަން ކުރިން ވެސް އޮތެވެ. އިންޓަނެޓު ކޭބަލް ބުރިވުމުގެ ސަބަބުން އިންޑިއާ އާއި ޕާކިސްތާނުގައިވެސް އިންޓަނެޓު ހިދުމަތަށް އަސަރުކޮށްފައިވެ އެވެ.