ޖުލައިގެ ނިޔަލަށް ޓޫރިޒަމް ސިނާއަތަށް 3,114 އެނދު އިތުރު ވެއްޖެ

މި އަހަރުގެ ޖުލައި މަހުގެ ނިޔަލަށް ރާއްޖޭގައި ޓޫރިސްޓުންނަށް ހިދުމަތް ދޭން އިތުރު 3,114 އެނދު އިތުރު ވެއްޖެ އެވެ. 

މަރުކަޒީ ބޭންކް (އެމްއެމްއޭ) އިން ނެރުނު މިދިޔަ މަހުގެ އިކޮނޮމިކް އަޕްޑޭޓުގައިވާ ގޮތުން މިދިޔަ އަހަރުގެ ޖުލައި އިން މި އަހަރުގެ ޖުލައިގެ ނިޔަލަށް ބަލާނަމަ ޓޫރިޒަމް ސިނާއަތަށް 3,114 އެނދު އިތުރުވެފައިވާއިރު މި އަހަރު ޖުލައިގެ ނިޔަލަށް ޓޫރިޒަމް ސިނާއަތުގެ % 59 އެނދު ފުލްކޮށް ހިދުމަތް ދީފައިވެ އެވެ. މިދިޔަ އަހަރު މި އަދަދު ހުރީ %57 ގަ އެވެ. 

މި މައުލޫމާތުތައް ދައްކާ ގޮތުގައި މި މުއްދަތުގައި ޓޫރިޒަމް ސިނާއަތަށް ނުވަ ޕަސެންޓުގެ އިތުރުވުމެއް ލިބިފައިވެ އެވެ. އަދި މި މުއްދަތުގައި ޓޫރިސްޓު ބެޑްނައިޓްސް އިތުރުވެފައިވަނީ އެއް ޕަސެންޓެވެ. ނަމަވެސް މި މުއްދަތުގައި ޓޫރިސްޓުން ރާއްޖޭގައި މަޑުކުރި މުއްދަތު ވަނީ 7.6 ދުވަހުން 6.9 ދުވަހަށް ދަށްވެފަ އެވެ. 

ޓޫރިޒަމް މިނިސްޓްރީގެ މައުލޫމާތުތައް ދައްކާ ގޮތުގައި މި އަހަރުގެ ބުރާސްފަތި ދުވަހުގެ ނިޔަލަށް ރާއްޖެއަށް 1,492,075 ޓޫރިސްޓުން އައިސްފައިވެ އެވެ.މިއީ މިދިޔަ އަހަރު އައި 1,363,333 ޓޫރިސްޓުންނާ އަޅާބަލާއިރު 9.4 ޕަސެންޓުގެ އިތުރުވުމެކެވެ. އަދި އެ މުއްދަތުގެ ނިޔަލަށް ޓޫރިޒަމް ސިނާއަތުގެ ޖުމްލަ އެނދުގެ އަދަދު ވަނީ 65,143 އަށް އިތުރުވެފަ އެވެ.