ބޮޑުތަކުރުފާނު މަގު ހަތަރު ލޭނަށް ބަދަލު ކުރުން ހަލުވިކަމާއެކު ކުރިއަށް

އެމްޓީސީސީ އިން ކުރިއަށް ގެންދާ ބޮޑުތަކުރުފާނު މަގު ހަތަރު ލޭނަށް ބަދަލު ކުރުމުގެ މަސައްކަތް ހަލުވިކަމާއެކު ކުރިއަށް އެބަދެ އެވެ. 

މާލޭގެ މަލަމަތި ބަދަލު ވެގެންދާނެ މި މަޝްރޫއުގެ މަސައްކަތް ކުރާ ސަރުކާރުގެ އެންމެ ބޮޑު ކޮންސްޓްރަކްޝަން ކުންފުނި އެމްޓީީސީސީގެ މެނޭޖިން ޑިރެކްޓަރު ކުރީގެ ޑެޕިއުޓީ ކޮމިޝަނަރު އޮފް ޕޮލިސް އަހްމަދު ސައުދީ ވަނީ އިއްޔެ މި މަސައްކަތް ހިނގާ ގޮތް ބައްލަވާ ލައްވާފަ އެވެ. 

މި މަސައްކަތުގައި މިހާތަނަށް 72 މީޓަރުގައި ޕައިލިން ޖެހުމުގެ މަސައްކަތް ވަނީ ނިންމާލާފަ އެވެ. މީގެ އިތުރުން މަގަތު ތޮށިގަނޑުގެ ބޮޑުބައެއް ތަޅާލުމުގެ މަސައްކަތް ވަނީ ނިންމާލާފަ އެވެ. މިއާއެކު ދެން ފެށިގެންދާނީ އެ ސަރަހައްދުން ހިއްކަން ޖެހޭ ބައި ހިއްކުމުގެ މަސައްކަތް ތަކެވެ. 

އެމްޓީސީސީ އިން މި މަސައްކަތް ފުރިހަމަ ކޮށް ނިމޭއިރު، ހުޅުމާލެ ފެރީ ޓާމިނަލުން ފެށިގެން ލޯކަލް މާރުކޭޓާ ހަމައަށް 830 މީޓަރުގައި ތާރު އަޅާނެ އެވެ. މީގެ އިތުރުން  މަގު ފުޅާކޮށް އެއްގަމު ތޮށި ބޭރަށް ޖައްސައި ހަތަރު ލޭނަށް ބަދަލު ކުރާނެ އެވެ. އަދި މި މަޝްރޫއުގެ ދަށުން ފެން ހިންދާ ނިޒާމާއި ދުވާރު ގާއިމްކޮށް، ރޯޑް މާކިން އަދި ސައިން ބޯޑު ހަރުކުރާނެ އެވެ. މި މަސައްކަތުގެ އަގަކީ 144 މިލިއަން ރުފިޔާ އެވެ. އަދި މި މަސައްކަތް 455 ދުވަސް ތެރޭގައި ނިންމާލާނެ އެވެ.