ދިވެހި ޓޫރިޒަމްގެ އެއް ބާނީ އެމްޔޫ މަނިކް އަވަހާރަ ވެއްޖެ

ދިވެހި ޓޫރިޒަމް ވުޖޫދު ކުރުމުގައި އިސްކޮށް ހަރަކާތްތެރިވި އެއް ބާނީ އަދި ޔުނިވާސަލް އެންޓަޕްރައިސަސްގެ ވެރިޔާ މުހައްމަދު އުމަރުމަނިކް (އެމްޔޫ މަނިކް) އަވަހާރަ ވެއްޖެ އެވެ. 

ދަ މިރާ އަށް އެނގިފައިވާ ގޮތުގައި ދައުލަތަށް 19 އަހަރަށް ވުރެ ގިނަ ދުވަހު ހިދުމަތް ކުރައްވަވާފައިވާ އަދި ދިވެހި ޓޫރިޒަމްގެ އެންމެ ބޮޑު އެއް މަރުކާކަމަށްވާ ޔުނިވާސަލްގެ ވެރިޔާ އެމްޔޫ މަނިކް އަވަހާރަވީ ސިންގަޕޫރު މައުންޓް އެލިޒަބަތު ހޮސްޕިޓަލްގައި ފަރުވާދެމުން މިއަދު ހެނދުނު 6.30 ގަ އެވެ، 

އެމްޔޫއަށް ސިންގަޕޫރު ހޮސްޕިޓަލެއްގެ އައިސީޔޫގައި ފަރުވާ ދޭން ފަށާފައިވަނީ މީގެ ހަތަރު ވަރަކަށް ދުވަސް ކުރިންނެވެ. 

އެމްޔޫ މަނިކް - އުމުރުން 90 އަހަރުވެފައިވާ މަނިކްއަކީ ރާއްޖޭގެ އަށް އެންމެ ބޮޑަށް ހިދުމަތް ކުރެއްވި އެއް ބޭފުޅާ އެވެ. އެމަނިކުފާނު ކުރެއްވި މަސައްކަތް ގުނާ އަގު ނުކުރެވޭނެ އެވެ. އެ މަނިކްފާނު ހާއްސަ ވެގެން ދަނީ ޓޫރިޒަމް ސިނާއަތުގެ ދާއިރާއިންނެވެ. އެމްޔޫމަނިކްގެ ގިނަ ހިދުމަތްތަކެއް އެންމެ ބޮޑަށް ފެނިގެން ގޮސްފައިވަނީ މައި ވައިގެ ބަނދަރުގަ އެވެ. މީގެ އިތުރުން ސަރުކާރުގެ އެކި ވަޒީފާތަކުގެ އިތުރުން ވިޔަފާރިވެރިންގެ ގައުމީ ޖަމިއްޔާ އުފެއްދެވުމުގައިވެސް އިސް ދައުރެއް އަދާކުރެއްވި އެވެ.

ދިވެހި ދައުލަތުގެ އެންމެ މަތީ ޝަރަފު އަރުއްވާފައިވާ އެމްޔޫ މަނިކްއަކީ 1972 ވަނަ އަހަރު ރާއްޖެއަށް ޓޫރިޒަމް ތަރައްގީ ކުރުމަށް އެންމެ ބޮޑު މަސައްކަތެއް ކުރެއްވި އެއް ބޭފުޅާ އެވެ. މިގޮތުން ރާއްޖޭގެ ފުރިހަމަ ރިސޯޓް ކަމަށްވާ ކުރުނބާ ހުޅުއްވީ އެ މަނިކްފާނެވެ. މީގެ އިތުރުން ދިވެހި އެންމެ ބޮޑު ޓޫރިޒަމް ކުންފުނި ކަމަށްވާ ޔުނިވާސަލްގެ ދަށުން ދުނިޔޭގެ ނަން މަޝްހޫރު ޓޫރިޒަމް ގިނަ ބްރޭންޑްތަކެއް ރާއްޖެ ގެނެސްދެއްވި އެވެ.

ރާއްޖޭގެ ޓޫރިޒަމަށް އެމްޔޫ މަނިކު ކޮށްދެއްވާފައިވާ ހިދުމަތްތަކުގެ އަގުވަޒަންކޮށް 2011 ވަނަ އަހަރު އޭނާ އަށް ދިވެހި ދައުލަތުގެ އިއްޒަތް އަރުވާފައިވެ އެވެ. އަދި 1982 ވަނަ އަހަރު ހިތްވަރު ދިނުމު އިނާމު ދީފައިވެ އެވެ. މީގެ އިތުރުން 2002 ވަނަ އަހަރު ޝަރަފުވެރިކަމު އިނާމުވެސް ދެއްވާފައިވެ އެވެ. އަދި ރާއްޖޭގެ މިނިވަންކަމަށް 25 އަހަރު ފުރުމުގެ މުނާސަބަތުގައި ދިން ހިދުމަތުގެ އިނާމާއި ދައުލަތަށް ގިނަ ދުވަހު ހިދުމަތް ކުރެއްވުމުގެ އިނާމުވެސް ދެއްވާފައިވެ އެވެ.